Asia World Cup qualifier ; Iran leh South Korea inhnehtawk - beisei a la awm
World Cup 2022 khelh ngei tumin Asia ramte pawh an la inel ve zel a, mahse, qualifier third round a nih tawh avangin team 12 bak an inel tawh lo.
Thawhlehni zana inkhel ngaihven hlawh zingah Iran leh South Korea chu goal khat ve ve khungin an inhnehtawk a, ram pahnihin Qatar pan turin beiseina an la neih chhunzawm zel.
South Korea tan an thiampuipa Son Heung-min chuan goal hmahruai a khung a, Iran tan Alireza Jahanbakhsh chuan si phurh sutin team pahnih hi 1-1 in an ṭin.
Match thuma vawi khat chiah la chak Japan-in an beiseina chhi nung turin an match linaah Australia chu 2-1 in an hneh a, Japan tan Ao Tanaka leh Aziz Behich (own goal) chuan goal khat ve ve an khung.
Iran 1-1 South Korea
Asian football powerhouse hming lam a nih dawnin Iran leh South Korea hming lam hmaih a ni ngai lo - Thawhlehni zanah team pahnih an intawng a, beisei ang ngeiin inkhel a hmuhnawm.
South Korea tan Son chuan mamawh chhanna a ni tih pholangin minute 48-naah goal hmahruai a khung a, an chakpui mai tura ngaih a nih laiin Feyenoord tan Jahanbakhsh chuan si phurh a sut a, goal dang a luh loh avangin an inhnehtawk.
Iran-in match li an khelh tawhah point 10 neiin hma an hruai mek a, an hnuai chiahah point riat nen South Korea an awm thung - match ruk khelh tur a la awm avangin team pahnih tan Qatar pan ngeina chance a la sang hle.
Mualneitu Iran tan Saeed Ezatolahi chuan post a tih per a, Porto forward Mehdi Taremi-a'n post a pet per bakah chance duhawm a hlah a, Sardar Azmoun-a vanneih zan a ni lo bawk - South Korea tan Na Sang-ho-a'n hun tawp dawna a chance neih a chhawr loh chu a ui vawng vawng ang.
Inkhel hmuhnawm
Group A inkhel ngaihven hlawh dangah United Arab Emirates leh Iraq te 2-2 in an inhnehtawk a, hun tawp hnaih lamah boruak a sang hle - UAE tan hian Caio Canedo Corrêa chuan minute 33-na lekah goal hmahruai a khung.
Iraq lamin minute 70 hnua Mohammed Al-Attas (own goal) hmangin si phurh an sut a, Aymen Hussein chuan minute 89-naah a chhunzawm zui. Iraq hi an chak zui mai a rinawm laiin UAE tan Ali Mabkhout chuan hun pek belhah si phurh a sut leh a, an inhnehtawk.
Syria-in Lebanon nen an inkhelah minute 20-na leka Omar Khribin goal hmangi hma hruai mah se Mohamad Kdouh chuan first half hun pek belhah goal hnih khungin a team tan beiseina a rawn siam a, Hassan Ali Saad chuan minute 53-naah a belhchhah bawk.
Mahse, Syria an beidawng duh bik lo a, Omar Al Somah chuan minute 64-naah a khung ve leh - si phurh erawh an sut zo thei ta chuang lo a, match liah point khat chiah an la neih avangin beisei a tlem hle.
Australia an tlawm
Japan-in an match hmasa pathum aṭangin point thum chauh an nei a, a beidawnthlak hle. Mahse, team ṭha Australia chu insiamṭhat nana hmangin 2-1 in an hneh.
Blue Samurai (Japan sawina) tan Ao Tanaka chuan minute riatnaah goal a khung nghal a, awlsam takin an chak mai dawn niin a lang - mahse, Ajdin Hrustic chuan minute 70-naah si phurh a rawn sut.
Hrustic hi Hidemasa Morita chuan penalty area-ah a titlu a, referee Abdulrahman Al Jassim chuan penalty a pek zet hnuah VAR hmanga ennawn hnuah freekick-a thlaksak a ni. Mahse, Eintracht Frankfurt attacking midfielder hian freekick hi ṭha zetin a thlawh lut a, 1-1 a ni.
Mahse, an match hmasa pathum aṭanga vawi khat chiah chak Japan vanneih zan a ni a, Behich chuan hun tawp nan minute ruk chauh a awm tawh tihah Takuma Asano shot aṭanga ball kal chu an lamah a ti lut palh a, 2-1 in Japan an chak.
Group B-ah Japan-in match li aṭanga point ruk hmuin palina an ni a, Australia erawh point thuma hmahruaitu Saudi Arabia pha loin pahnihna an ni thung.
China ngamtu Saudi
Asian football-a sum ngah pahnih Saudi Arabia leh China inkhelah 3-2 in Saudi Arabia an chak a, group B-a match li an khelh tawhah Saudi Arabia hi an la chak fai vek!
Green Falcons (Saudi sawina) tan Sami Al-Najei chuan minute 38 chhungin goal hnih a khung a, China tan minute 46-naah Aloísio dos Santos Gonçalves chuan si phurh a rawn sut ṭhen.
Mahse, Firas Al-Buraikan chuan minute 72-naah a khung leh a, China tana minute 87-naa Wu Xi goal khungin awmzia a nei phak lo - China hian match li aṭangin point li chiah an la nei.
Group B inkhel dangah Oman-in an beiseina chhi nung turin Vietnam chu 3-1 in an hneh ve bawk - Vietnam tan Nguyen Tien Linh chuan goal hmahruai khung mah se Oman-in Issam Al Sabhi, Mohsin Al-Khaldi leh Salaah Al-Yahyaei (penalty) hmangin an chhanglet a, an chak chiang.