Irving ziak lut dawn lo

Kyrie Irving-a'n hripui leng laka invenna (vaccine) a la duh lo a, a club khelhna Brooklyn Nets awmna khawpui New York City chuan inkhelh an la phal lo - Nets pawhin an player hi an chhawr thei dawn lo a nih chuan squad-ah ziah luh an tum lo.

NBA danah player zawng zawng tan vaccine lak kher a ngai lo, mahse khawpui ṭhenkhat chuan an huam chhunga infiammite chu hri laka invenna la ngei turin a ti thung a, basketball thuneitu sang aiin khawpui thuneitu lam an lal zawk.

Basketball inelna sang berah hian match an khel hnem ṭhin, regular season bikah pawh home match hi 30 chuang khelh tur an nei, hengah hian Irving a inlan thei dawn lo tihna a ni a, New York bakah San Francisco khawpuiah a inkhel thei dawn lo.

Brooklyn Nets general manager Sean Marks chuan, "Mimal zalenna kan ngai pawimawhin kan zahsak a, chutih rualin tun dinhmuna khawpui thuneitu lam thu kan zawm a ngai bawk si, match tam tak khel thei lo chiang tur player neih chuan harsatna a tling," a ti.

Irving hi NBA All-Star zinga vawi sarih tel tawh a ni a, player ṭha bik a ni - a inlan thei lo a nih chuan Nets tan a pawi tham ang. Vaccine a la a nih erawh chuan harsatna nei loin a inkhel thei thung dawn a ni.