Quarterfinal-ah Kerber a lut

Angelique Kerber chuan Ajla Tomljanovic hnehin Indian Wells Masters khelh laiah quarterfinal a lut, BNP Paribas Open tia an sawi bawk tournament-ah hian Kerber hian a zawnin vawi thum chu last 16 a paltlang ta.

German nula Kerber-i'n Australian player lakah harsatna lian tham a tawk lo, a service a hum ṭhat avangin harsa lo tak 6-4, 6-1 in hnehna a chang a, a match lehpekah chuan Paula Badosa a hmachhawn leh ang.

Grand Slam vawi thum champion tawh Kerber chuan, "Inkhel hautak tak a ni, khel ṭha viau mah ila na takin min bei let thei. A bik takin set hmasaah khan kan inbei tawk, a hnuhnung zawk kha chu kawng a awlsam ta deuh," tiin a sawi.

Hnehna chang tur hian vawi 21 ngawt winners a vaw thei a, mahse a tihsual avanga a khingpuiin point a hmuh (unforced errors) ṭum 21 bawk a neih avangin insiamṭhatna tur a la ngah, semifinal lut tur chuan tihsual neih tlem a pawimawh ang.