Argentina hmabak Peru

Lionel Messi awmna Argentina chuan a hma thei angin Qatar World Cup ticket neih an duh a, awlsam taka neih mai theih erawh a ni bik lo. La Albiceleste hian Zirtawpni zing dar 5:00-ah Peru an mikhual ang.

Brazil pawhin zing dar 6:00-ah Uruguay an hmachhawn dawn. Tite-a naute hian an match hnuhnung berah Colombia an inhnehtawkpui a, tun qualifier bika point an hlohna hmasa ber a ni - world champion hmasa ber lakah chak an tum dawn.

Messi telna
Argentina hian an match hnuhnung berah Uruguay 3-0 in an hneh, nuamsa taka chak angin lang mah se a awlsam lo. Messi-a'n goal mawi a khung a, tun ṭumah pawh Barcelona captain hlui hi tlarhma lama an innghahna a ni leh ang.

Lionel Scaloni-a'n Messi leh Lautaro Martínez a chhawr kawp thiam hle. Hmatawng pahnih hi Copa America champion a nihpui tawh a, tunah chuan World Cup champion ni thei turin a chher leh mek, an tan match zawng zawng hi in enchhinna a ni nghal zel.

Argentina hian Peru lakah record an nei ṭha, ram pahnih vawi 55 an inkhelh tawhah ṭum 34 an chak a; Peru hian vawi sarih chiah hnehna an chang. Tun ṭuma an inkhelhna tur hi Argentina rama awm River Plate Stadium a nih avangin Peru tan chak beiseina a sang lo.

Rinkai ni lo mah se Peru tan erawh thapui thawh a ngai, an match hnuhnung berah Bolivia an hneh loh avangin table-ah pasarihna an ni. World Cup khel thei tur china awm palina Uruguay an phak lohna chu point nga a ni mek.

Brazil vs Uruguay
Football ngainatu tan chuan Zirtawpni zing hi thawh hma a ngai dawn. Argentina inkhel bakah Brazil leh Uruguay ten chak zawk nih an inchuh tur hi a hmuhnawm ang, ram pahnih hian player ṭha an kawl khawm hnem hle.

A bik takin Brazil hian goalkeeper aṭanga tlarhma ber thlengin player langsar an nei. Hmanni lawkah kum 29 mi Neymar-a'n nakkum hi atana World Cup hnuhnung ber a ni mai thei tih a sawi a, hei vang hian Paris Saint-Germain hian ṭum dang zawng aiin champion a chak zual ang.

Neymar hi a kum la tam lo mah se Messi leh Cristiano Ronaldo te rilru ang a pu lem lo tih chu hriatsa a ni a, chutih rualin Brazil tana hlawhtlinna chan erawh a chak takzet - Rio Olympic gold medal an lak ṭuma a awmdan khan a hrilhfiah.

Brazil ṭhatzia hriatsa a nih rualin Uruguay hian Luis Suarez leh Edinson Cavani te an kawl ve tho, an vanglai pel deuh tawh mah se Atletico Madrid leh Manchester United tana khel phak an la ni a, zuam sual hlauhawm tak an la ni reng.