Germany hero Bierhoff

Germany striker Oliver Bierhoff hi European Championship 1996 final-a goal hnih a khung avangin khawvelin tun thlengin a hria a, Wembley Stadium-a thil thleng kha mi ṭhahnem tak lawmna siamtu a nih rualin mi tam tak veltu a ni bawk.

Footballer tam tak ang lo takin Bierhoff hi German pa hausa tawntaw fapa a ni a, May 1, 1968 khan Karlsruhe, West Germany-ah a piang. Football-a a zinkawng erawh a bumboh ve hle. 

Bierhoff hian Bayer Uerdingen-ah bul a ṭan a, hemi hnu hian club lian zawk Hamburger SV leh Borussia Monchengladbach tan khelin Bundesliga-ah hming a chher thei lo.

Austrian Bundesliga lamah kalin Austria Salzburg tan khelin chanchin hriat zui tur a nei lo a, Italian club Ascoli zawmin heta ṭang hian club lian zawk Udinese a zawm.  Alberto Zaccheroni hnuaiah hming a chher chho a, Italian club tana a khelh ṭhat avangin Germany team-ah pawh thlan a ni hial.

Euro 1996 final-ah bench aṭanga lutin goal hnih a khung a, Germany-in Czech Republic 2-1 a hnehin an champion. Bierhoff hi kum 28 a nih hnuah khawvelin hre ṭan chauh mah se ram leh club tan a hming a chher zui hle.

Euro C'ship zawh hian Udinese tan la khel zuiin 1997/98 season-ah goal 27 a khung a; Ronaldo, Roberto Baggio leh Gabriel Batistuta te aia khung tamin Serie A top scorer a ni. 

Bierhoff hian chona sang zawk hmachhawnin AC Milan a zawm a, season khatnaaah a champion pui nghal. German striker hi 6ft 3in a sang a ni a, a lu a hmang thiam hle. 1998-99 season-ah phei chuan season khatah a lu hmang ringawtin goal 15 a khung. Serie A-ah hian Ascoli, Udinese leh Milan tan khelin goal 103 a khung a, Italian mi ni lo zinga Serie A-a goal khung tam zinga mi a ni.

Ram lamah pawh Bierhoff hian hmun pawimawh chang chhoin World Cup 1998 qualifier-a Northern Ireland an hmachhawn ṭumin 1-0 in an hnufual a, Berti Vogts-a'n minute 20-a la awmin Thomas Hassler leh Bierhoff a luhtir. Minute sarih chhung lekin Bierhoff-a'n hattrick a siam a, Hassler-a siamsak vek a ni.

Jurgen Klinsmann-a'n inkhelh a chawlhsan hnuah captain atan ruat a ni a, Euro 2000 bakah 1998 leh 2002 FIFA World Cup te an khel a. Ram tana a goal khung hnuhnun ber chu 2002 World Cup-a Saudi Arabia lama a khung kha a ni a, ram tan match 70 khelin goal 37 a khung.