Varane a chawl rei dawn

Manchester United defender Raphael Varane chu Nations League final-a France leh Spain inkhelh ṭumin ṭhal hliam vangin minute 43-naah an la chhuak a, a chawlh rei a ngai dawn.

French defender hian Ole Gunnar Solskjaer-a hnuaiah match rukah inkhel bul a ṭan tawh a, a awm lo tur hi channa lian tak a ni ang. Man United chuan, "Raphael Varane-a'n Nations League final-ah a ṭhal tihrawl a ti na a, kar engemaw zat a chawlh a ṭul dawn," tiin thuchhuah an siam.

Man United hian October 16, Inrinni zanah Leicester City hmachhawn turin King Power Stadium an tlawh dawn. Foxes zawh hian Atalanta (H), Liverpool, Tottenham, Atalanta (A) leh Manchester City te an hmachhawn dawn a, heng inkhelah te hian Varane tel loin a khelh a ṭul dawn niin a lang.

Kum 28 mi Varane kawppui Harry Maguire chu chawn hliam vangin England squad-ah pawh telh a ni lo a, club captain hi Foxes an hmachhawn hunah a khelh theih loh a rinawm zawk.