Sweden an chak, Spain dinhmun a derthawng

Thawhlehni zan World Cup qualifier-ah Sweden-in Greece 2-0 in an hneh a, Spain lehpelin group B hmahruaitu an ni. Group khat aṭangin a sang ber chauh World Cup khel turin an tling nghal dawn a, Luis Enrique hote hi playoff khel thei dinhmunah an ding.

Friend Arena-ah Sweden-in Greece an mikhual a, Qatar zin theih beiseina la nei ve ve an nih avangin inkhel a pawimawh. Greece-in inkhel bul ṭan ṭha zawk mah se goal hmaah an vanduai - goal ban leh crossbar a tih per.

Sweden erawh an vannei a, Alexander Isak-a'n Greece defender Konstantinos Mavropanos lakah penalty a hlawh chhuak. Penalty hi minute 59-naah Emil Forsberg-a'n penalty aṭangin a khung.

Kum 22 mi Isak hian a class a pholang zui a, minute 69-naah keeper Odysseas Vlachodimos a paltlang hnuin 'cool' takin chak nemnghehna goal a khung. Greece-in a chhanletna an nei lo a, minute 86-naah Pantelis Chatzidiakos hnawhchhuah a nih avangin player 10-in an khel tluan.

Sweden hian September thla khan an mualah Spain 2-1 in an hneh a, November 14 zan hian La Roja hi Estadio de La Cartuja-ah an tlawh dawn. Janne Andersson hote hian November 11-a Georgia an hneh thei a nih chuan World Cup khel turin Spain draw a tawk ang.