Albania mualah Poland an chak

Inrinni zan World Cup qualifier-ah Albania leh Poland an inkhel a, mualneitu Albania fan-ten Poland player-te an vawm avangin inkhel tihkhawtlai ngai mah se 1-0 in Poland an chak.

Poland tan Karol Swiderski chuan minute 77-naah inkhela goal awmchhun hi a khung a, mahse, Albania fan-ten an mikhual player-te hi plastic bottle hmanga vawmin an tawng zui.

Fan-te chet dan avangin minute 20 chuang inkhel tihkhawtlai a ni a, an inkhelh chhunzawm hnuah goal dang lut loin Poland an chak.

Inkhel tihtawp ngai khawpa buaina chhuah hma hian Poland midfielder Piotr Zielinski chu fans lam hian an vawm tawh a, inkhelh zawha goal khungtu Swiderski kawm a nih pawhin tihtawp a ngai - fan-ten bottle-a an vawm zui avangin Poland manager Jakub Kwiatkowski chuan interview titawp turin a hrilh a ni.

Poland captain Robert Lewandowski chuan, "Goal kan khung hnuah khan bottle an rawn vawm lut nual a, a hlauhawm hle. Mahse, khelmuala kirin inkhel kan zo thei a ni," tiin thil thlen dan a sawi.

Group I-ah Poland hian point 17 neiin pahnihna dinhmun an luah a, an chunga awm England chu match hnih khelh tur la awmah point thumin an phak lo mek.