World Cup khel tur Denmark

Denmark chu World Cup 2022 khel tura inpet tling pahnihna an ni. Germany chu qualifier paltlanga tling hmasa ber an ni a, anni ram pahnih hma hian a thlengtu Qatar chu tling chiangsa an ni bawk.

Thawhlehni zan inkhelah Denmark hian Joakim Maehle-a goal khat hmangin an mikhual Austria 1-0 in an hneh a, match riat an khelh tawhah chak vekin point 24 an nei; group F hmahruaitu niin pahnihna Scotland aiin point sarihin an sang zawk a ni.

Denmark sulhnu hi a ropui, qualifier khelh tawh chinah match riat an chak zawn a ni satliah lo, goal 27 khungin anmahni lamah goal a lut miah lo! Qatar ticket neih hi an phu hle; kum 2002 hnua a vawi khat nan football inelna lian hi an hmachhawn leh ang.

Denmark captain Simon Kjaer chuan, "Tun dinhmun thleng tur hian kawng thui tak kan zawh, taksa lam inbuatsaihna bakah rilru thlengin kan ti paukhauh a, tun aia sang leh thui zawk hi kan thlen theih kan beisei," tiin a sawi.

Euro 2020 khelh zawh takah pawh khan Denmark hi team hmuhnawm an ni, midfielder Christian Eriksen chhawr chhunzawm thei ta lo mah se semifinal an thleng hial - Qatar World Cup-ah pawh mipui ngaihven hlawh zinga mi an nih a rinawm.