Wembley Stadium-a nomawi chawitu Germany

Euro 2020 final hi Wembley Stadium-a khelh tur a ni a, England chauh ni loin khawvela stadium lar ber zinga mi a ni. Stadium ropui hi sak ṭhat a nih hmain 'twin tower' vangin a lar a, English mipui pawhin an chhuang.

Wembley Stadium hi England football tan kulhpui a tih theih a, amaherawhchu kum 1996 khan an hmelma Germany chuan Wembley Stadium hi an luhchhuah. Semifinal-ah Die Mannschaft hian England hi Wembley Stadium-ah an hneh a, final pawh Wembley Stadium-ah tho khelh niin Czech Republic hnehin nomawi an chawi.

England-in David Beckham, Michael Owen, Paul Scholes, Steven Gerrard leh Frank Lampard te an neih hma pawh khan chhuang takin Alan Shearer, Paul Gascoigne, Steve McManaman leh ram tana mi hang captain hmasa ber Paul Ince te chanchin an sawi tawh ṭhin. 

England striker ṭha ber tia an chhal Shearer leh English zinga talent nei ṭha ber  anga an sawi Gascoigne ten Three Lions chu 1966 World Cup nomawi an chawi hnua a vawi khat nan inelna lian thama champion pui an tum a, beiseina pawh a sang.

Euro 1996-ah hian inelna thlengtu hian Europe ram lian dang Netherlands leh Spain te an hneh chho a, semifinal-ah an hmelma Germany nen an intawng. English mipuiin  'Football's coming home' an ti a, nomawi beiseiin an lam mup mup a ni ber. Amaherawhchu semifinal-ah Germany an tawng.

England football legend Gary Lineker chuan, "Football hi game awlsam tak a ni a, mipa 22-in minute 90 chhung ball an inchuh a, a tawpah German an chak leh ṭhin," tiin a sawi a, hemi dikna hi Euro 96 semifinal-ah a thleng.

Wembley Stadium-ah entu 75,862 lai an pungkhawm a, final ai pawhin entu an tam zawk. Minute 3-na lekah Alan Shearer-a'n a pet goal a, thawm a ring. Amaherawhchu Stefan Kuntz hmangin Germany-in an sut a, 1-1 in inkhel pangngai a tawp.

Penalty hmangin chak zawk zawn a ni a, tuna England manager nilai Gareth Southgate hian sudden death-ah penalty petin a hlah. Penalty Shootout-ah Germany 6-5 in an chak a, final an thleng.

Euro 1992 final-a an vanduai hnuin Germany-in 1996-ah final an thleng nawn a, an khingpui Czech Republic chu group stage-ah 2-0 a an hneh tawh avangin beisei pawh a sang hle. Chutihrualin hriat tel ngai a awm, kum li liam ta khan Germany hian mak takin Denmark an hneh tawh lo.

Wembley Stadium-a final an khelh ṭum pawh hian Pavel Nedved leh Karel Poborsky telna Czech Republic-in goal an khung hmasa zawk. Minute 59-naa an penalty hmuh chu Patrick Berger-a'n kawh zetin a pet goal a, Czech star hi English club lianin an hel nghal a, Liverpool-in inelna zawhah an lalut.

Germany chu chak lo thei dinhmunah an ding a, coach Berti Vogts tan thutlukna siam a harsa ta. Semifinal-a an luhtir ngam loh Olivier Bierhoff chu mualsirah a rawn ding a, mintute 69-naah midfielder ball thiam zet Mehmet Scholl a rawn thlak. Vogts-a'n risk a la tih chiang a, mah se risk chhan a awm.

Bierhoff hi Euro 96 ṭan hma thla li pawh tling tawh loah ram tana khel turin koh a ni ve chauh a, Germany kawr a hak hian kum 28 tlin nan ni 70 chiah a mamawh tawh a, thingtlangah chuan tlangval senior tih theih tur a ni tawh. February 21-ah Portugal nen friendly match a khel a, March 27-ah Denmark nen friendly khel lehin goal hnih a khung.

Vogts-a'n ṭangkaina tur a awmah ngaiin Germany team-ah a ko a, quarterfinal leh semifinal-a a chhawr loh chu final-ah goal mamawh laiin a luhtir ta chat. Minute 73-naah Christian Ziege freekick chu goal-ah a tauh lut a, 1-1 a nih tak avangin Germany dinhmun a ṭha zawk. Minute 90 chhungin an inhnehtawk a, extra time an khel a, golden goal hunlai a nih avangin a pet goal hmasa zawk an chak dawn.

Minute 95-naah tlarhnung aṭanga ball tauh chuah chu Bierhoff-a'n tauh pialin Jurgen Klinsmann-a'n a chang. Klinsmann hian Bierhoff hnenah a pe leh a, substitute kawlhrawng hian vengtu nei mah se ball chu vir puiin goal-ah a pet a, goalkeeper Petr Kouba-a'n a tihtur a tihtawk loh bawk avangin Germany champion nan a tawk.

Germany-in player lar Andreas Kopke, Matthias Sammer, Mehmet Scholl, Thomas Hassler leh player langsar dangte an kawl a, a tawpa chhandamtu erawh inelna ṭan hmaa hriat hlawh lo Bierhoff a ni.