Maldives aiah India; Chhetri aiah Apuia!

SAFF Championship-a final lut turin an match hnuhnung berah India-in chak ngei ngei an mamawh a, inelna thlengtu Maldives chu 3-1 a hnehin final an lut.

India tan thiampuipa Sunil Chhetri chuan a tar thei lo tih pholangin goal hnih a khung a, Manvir Singh chuan Blue Tigers jersey hak a phu tih pholangin goal khat a khung bawk.

Inkhelh zawhah goal hnih khungtu Chhetri chu man of the match chawimawina hlan a ni a, mahse, India captain hian midfield-a roreltu Lalengmawia (Apuia) a theihnghilh lo.

Chhetri-a'n a lawmman dawn chu Apuia‘n a phu zawk niin a hria a, Vaivakawn tlangval hnenah a hlan chhawng - Mizo tlangval hian he zan duhawm hi a theihnghilh tawh lo ang.

Boruak sang
Mipui 11,000 lenna National Football Stadium-ah Maldives jersey sen hain fans an khat vek a, an thawm ringawt pawh mikhual India tan chuan hlauhthawnna tham a ni.

India coach Igor Stimac-a'n match hmasa pahniha hnehna a chan zawh loh hnuin Nepal lakah team a thlak danglam a, hnehna a chanpui. Croatian coach hian hei hi hriain Maldives lakah pawh Nepal laka khelte vek bul a ṭantir a, Apuia pawh midfield-ah a rawn ding.

Inkhel ṭantir aṭangin boruak a sang nghal a, mipui auh phurna karah Maldives an phur a, ṭum dang ang thoin tlarhnung lama India player-te an talbuai a, chance hlauhawm nei hmasa zawk erawh India an ni.

Minute 26-na lekah Sunil Chhetri chuan goal bar a tauh per nghal a, Maldives fan-te an reh hman! Minute hnih liam hnuah Maldives lamin chance duhawm an rawn nei ve zui a, mahse, South Asia lama striker ṭha ber pawl Ali Ashfaq chuan a hun ṭha neih a chhawr bik lo.

India an chungnung
Minute 33-na a ni a, India-in goal an khung ta nge nge. Manvir Singh chuan chak zeta ball a tlanpui hnuin goal-ah a pet a, Maldives keeper Mohamed Faisal tan dan chi rual a ni lo.

India hlim chhung erawh a rei lo hle. Minute 45-naah Pritam Kotal chuan Hamza Mohamed a ti tlu a, penalty a chawi. Maldives tan tawnhriat nei ṭha Ali Ashfaq a rawn pen chhuak a, India keeper Gurpreet Singh Sandhu rin lohna lamah petin a goal chiang hle.

Goal dang lut loin chawlhlawk hman a ni a, Maldives-in beiseina an nei. Mahse, India-in chak ngei an duh a, tun inelnaa an khelh ṭhat ber ṭum a ni hial ang - Apuia ball thlawh luh ṭha zet chu Manvir-a'n a awma la thlain Chhetri tan a siamsak a, Bengaluru striker hian a hlah lo.

Maldives-in Ashfaq-a freekick hmangin chance nei ve leh nghal zat mah se India bawkin goal an khung leh a, Kotal-a freekick pet aṭanga ball kal chu Chhetri-a'n a tauh lut - India-in kum 2018 final-a an ngam loh Maldives lakah phuba lain final an lut a, 1-1 a Bangladesh inhnehtawkpuitu Nepal nen champion an inchuh ang.

Chhetri 79
India tan Chhetri-a'n goal hnih a khung leh ta a, tun inelnaa India goal khung panga zinga goal li hi ama khung a ni - SAFF Championship khelh mekah ani aia khung hnem an awm lo.

Kum 37 mi striker hian India tan match 124-a khelhah goal 79 zet a khung tling ta bawk a, international football-a goal khung hnem lamah parukna a ni phak ta hial.

Chhetri hian ram tana inkhel mek zingah Cristiano Ronaldo (115 goals) leh Lionel Messi (80) te chu international football-a goal khung tam lama a tluk lohte an ni a, a record a ropui hle.

Sunil Chhetri ropui zanah India coach Igor Stimac erawh khelmual pawn lama a chet dan avangin red card pek a ni a, hun pek belhah defender Subhasish Bose chu hnawhchhuah a ni bawk.

Danglamna Apuia
India midfield-in sawisel an hlawh ṭhin a, tlarhma nen an inman tawk lo a, ball hlauhawm pawh forward-te tan an chhawpsak thei ṭhin lo - Apuia'n bul a ṭan hnuah erawh a danglam ta.

Vaivakawn tlangval hian a ṭul hunah ball a keng ngam a, Maldives goal nawr tur vawi tam a chhu chat a, a ṭhiante tan goal khungna remchang a siam reng bawk - a inkhel en tan chuan kum 20 mi a ni tih hi awih a har hial zawk.

Apuia chuan, "Hun rei tak hnua fans tam tak hmaa khelh chu nuam tak a ni. Maldives hian min hmachhawn hma an inkhelah pawh khati zat fans an nei ngai lo. Min hmachhawn dawn avangin an ṭang tih a hriat a, mahse, zam ai mah chuan ka phur phah zawk," tiin Vanglaini a hrilh!‘

Mumbai City midfielder thar chuan, „Ka khelh danah ka lawm a, ka khelhpuite nen kan inthlawp ṭhat vang a ni bawk. Chhetri-a'n award min pek khan mak ka ti deuh a, mahse, "Award dawn hi i phu zawk," a ti a, a lawmawm ve duh khawp mai," tiin Vanglaini a hrilh bawk.

Hliam nei loa final hmachhawn thei tur te, ṭha taka final khela kan champion theih ngeina tur ten, Mizo mipuiten min lo ṭawngṭaipui vek turin ka sawm che u a ni. - Apuia, India midfielder