Zaninah IPL hmawr bawk a ni dawn
Indian Premier League vawi 14-na final chu zanin dar 7:30 hian Chennai Super Kings leh Kolkata Knight Riders ten an khel dawn. Inkhelhna tur hmun hi Dubai International Stadium a ni ang.
Chennai captain hi India captain hlui Mahendra Singh Dhoni a ni a, Kolkata cpatain hi England tana ODI leh T20 captain ni lai Eoin Morgan a ni thung. Captain ṭha pahnih hnuaia khel tur an nih avang ringawt pawhin final hi a hmuhnawm dawn.
Champion tawh
Chennai Super Kings hi IPL final lut ngun ber an ni a, ṭum riat zet final lut tawhin vawi thum an champion. Nomawi lak tamah erawh Mumbai Indians record a ṭha zawk a, vawi ruk final an luhah vawi nga an chak.
CSK khingpui tur Kolkata Knight Riders hian final vawi hnih chiah an lalut a, an la champion ve ve. KKR hian zanina Chennai an hneh a nih chuan an champion zat a inang dawn a, Morgan-a hote hi champion thei turin theihna an nei a ni.
League round-ah KKR hi palina ni pha chauh mah se eliminator-ah Royal Challenger Bangalore an hneh a, qualifier 2-ah league round-a pakhatna Delhi Capitals an hneh leh bawk.
Intum tawhna
Chennai leh Kolkata inhmachhawn ṭum chu Covid-19 in a tihbuai hma kha niin Wankhede Stadium, Mumbai-ah an inkhel. KKR hian vawm hmasak an thlang a, amaherawhchu CSK tana Faf du Plessis-a'n thi loin 95 runs tehmeuh a siam avangin over 20-ah 220/3 an siam.
CSK bowler Deepak Chahar-a'n wicket li (29/4) a la a, KKR hian 19.1 overs-ah 202 runs chauh siamin an thi fai vek. An inhmachhawn hnuhnun zawk erawh Abu Dhabi-ah a ni tawh thung.
KKR-in bat hmasak an thlang ve thung a, Rahul Tripathi-a'n 45 runs siam mah se over 20-ah 171/6 runs an siam. Chennai-in over 20-naah 172/8 runs siamin target an umpha hram a, South African batsman Faf du Plessis bawk che ṭhain 43 runs a siam.
Final chu
Champion zawnna tur Dubai International Cricket Stadium hi qualifier 1 khelhna a ni a, CSK-in Delhi Capitals an hneh. Chennai hian Delhi target chhawpsak 173 chu an umpha.
Chutihrualin CSK-in league round bika Dubai-a an khelhna hnuhnung berah erawh bat hmasain 134/6 runs chauh an siam a, Punjab Kings an hneh lo.
KKR-in Dubai-a an match hnuhnung berah Sunrisers chu 115/8 runs chauh an siamtir a, an hneh. A tawi zawng chuan final-ah ṭhumvawr a pawimawh dawn a, bat hnuhnung zawk tan champion-na chance a sang ang.
Final hi Dhoni leh Morgan inbeihna a ni ringawt dawn lo. KKR hian Indian player Shubman Gill, Varun Chakaravarthy, Venkatesh Iyer, Rahul Tripathi leh Nitish Rana te an pawimawh dawn.
Super Kings batting lamah opener pahnih Faf du Plessis leh Ruturaj Gaikwad te an che ṭha ṭhin a, bowling lamah Shardul Thakur, Dwayne Bravo leh Josh Hazlewood te inngahna an ni dawn. Hun pawimawh a ni tawh avangin all rounder Ravindra Jadeja inlar hun a ni thei bawk.