Watford ka hmachhawn theih ka ring lo - Fabinho

Liverpool-in October 16, Inrinni zan dar 5:00 hian Watford hmachhawn turin Vicarage Road an tlawh dawn a, Brazilian midfielder Fabinho chuan amah leh keeper Alisson te an inkhelh theih a beisei loh thu a sawi.

Brazil-in tukin zing dar 6:00 hian Amazônia Arena, Manaus-ah Uruguay an mikhual a, World Cup qualifier khelh zawha Premier League khel lehnghal turin hun a tlem mah mah.

Fabinho chuan, "Watford hi kan tan hmachhawn a ngai dawn. Kei leh Alisson te kan khelh theih ka ring lo. Quarantine kan la ngai dawn bawk a, club-in kan awm dan tur an zirchiang ang.

"Spain pan nghal a, Atletico Madrid hmachhawn nghal theih a nih chuan England hotel-a inkhung loin Spain-ah kan inkhung zawk ang," tiin an harsatna a sawi chhuak.

Brazilian forward Roberto Firmino erawh Brazil manager Tite-a'n a koh ve loh avangin buaina a nei lo. Chutihrualin Brazil leh Uruguay inkhel tur hian Premier League-ah nghawng a nei lian.

Chelsea defender Thiago Silva, Aston Villa midfielder Douglas Luiz, Manchester City forward Gabriel Jesus leh keeper Ederson, Leeds United forward Raphinha leh Manchester United midfielder Fred leh forward Edinson Cavani te pawhin kartawp inkhelah harsatna an nei ang.