World Cup khelh tum Mexico an la tlawm lo
November 2020 hnua a vawi khat nan Raúl Jiménez chuan Mexico tan goal a khung ve leh ta a, World Cup qualifier-ah Mexico chu El Salvador lakah 2-0 in hnehna a chanpui.
Jimenez hian a goal hi hun pek belhah penalty aṭanga a khung a ni a, Mexico tan Hector Moreno chuan goal hmahruai a khung bawk. Mexico hian third round-a match ruk an khelh aṭangin point 14 an nei a, tlawm an la nei lo.
Third round inkhel dangah USA chuan 2-1 in Costa Rica an hneh a, Canada chuan 4-1 in Panama an sawp a, Jamaica chuan 2-0 in Honduras an hneh bawk - CONCACAF pawh a ngaihnawm zel e.
Inelna kalphung
CONCACAF-in World Cup-ah hmun ruak pathum an nei chiang a, inter-confederation playoff kaltlangin hmun ruak pakhat an la luah leh thei bawk. Qualifier-ah hian FIFA ranking-a a sang zual panga chuan third round an lut nghal.
A sang panga zinga tel phak lo rank 6-35 te chu group parukah, team panga zel awmin ṭhen hran an ni. Team tinte vawi khat ṭheuh (match li) an intum kual hnuah group tina a sang ber chuan second round an lut.
Second round-ah knockout (double leg) hmangin team parukte an inkhel a, a chak zawk team pathumte chuan third round-a team awmsa panga an zawm - an vai hian home & away-a an inkhelh kual hnuah a sang pathum chu World Cup khel turin an tling a, palinain inter-confederation playoff an khel ang.
Mexico beiseina
El Salvador khelmualah chak tura rin hlawh sa Mexico tan Hector Moreno chuan minute 30-naah goal hmahruai a khung nghal a, hun pek belh minute thumnaa penalty hmangin Jimenez-a'n chak a nemnghet.
Mexico-in 1-0 a hma an hruai laiin El Salvador defender Mario Jacobo chuan Rogelio Funes Mori laka a foul avangin red card a hmu a, Mexico centre back Nestor Araujo chuan Alexander Larín a kiua a nghawk luih avangin red card hmu ve leh mah se El Salvador-in si phurh an sut thei chuang lo.
Hun tawp dawnah Josué Acosta Ramos chuan penalty area-ah Jimenez a ti tlu a, Wolverhampton Wanderers striker hian ram tan match 89-a khelha a goal 28-na ni turin goal-ah a chantir a, Mexico an chak chiang.
Canada an kal zel
Kum 1986 hnua World Cup la khel leh lo Canada-in an ram chanchina a vawi hnih nan World Cup khel turin beiseina an nei ve zel a, an mikhual Panama chu 4-1 ngawtin an sawp.
Panama tan hian Rolando Blackburn chuan minute ngana lekah goal hmahruai rawn khung mah se Canada nawr let an dawl lo a, minute 28-naah Alphonso Davies corner aṭanga ball kal chu Michael Murillo chuan an lamah a ti lut.
Bayern Munich full back Davies hian minute 66-naah Canada hi hma a hruaipui zui a, Tajon Buchanan leh Jonathan David ten goal khat ve ve khung ve lehin 4-1 in an chak. Canada hi match ruk an khelha an vawi hnih chakna a ni a, point 10 hmuin table-ah pathumna an ni mek.
USA an chak
Costa Rica-in Keysher Fuller hmangin minute khatna lekah goal hmahruai an khung a, mahse, Sergino Dest leh Leonel Moreira (own goal) ten USA tana chhangletin inkhel hmuhnawmah an chak.
USA hi match ruk an khelha vawi thum an chakna a ni a, table-ah pahnihna dinhmun luahin Mexico chiah an phak lo mek - World Cup khelh beiseina a la sang hle.
Jamaica-in 2-0 in Honduras an hneh a, Rangers forward Kemar Roofe leh LA Galaxy player Oniel Fisher ten goal khat ve ve an khung. Jamaica hi match ruka an vawi khat chakna chauh a ni - mahse, match riat lai khelh tur a la awm avangin table hi a la inher danglam thei viau ang.