Hodgson khum inringtu Ranieri

Watford manager thar Claudio Ranieri chu a kum tam deuh tawh mah se a zam lo. Italian manager hian Premier League manager zinga upa ber record a siam theih a rin thu a sawi, record siam tur erawh chuan hun a la mamawh deuh dawn.

Ranieri hian Inrinni zanah Liverpool a hmachhawn dawn, Reds an hmachhawn aṭanga ni li hnuah kum 70 a tling ang. EPL manager zinga upa ber chu Roy Hodgson a ni a, kum 74 a tlin hma thla hnih chauh awm tawhah Crystal Palace nen an inṭhen.

Leicester City a enkawl laia EPL nomawi chawi tawh Ranieri chuan, "Engah nge ka theih loh ang? ka la upa hleinem, ka kum hi ka ngaihtuah ber a ni lo. Ka hriselna a ṭha a, chak châkin ka la tuihal reng, player enkawl turin thahrui ka la nei," tiin a la fit tawk thu a sawi.

Ranieri hian tun hmain Chelsea, Leicester leh Fulham te a lo enkawl tawh, English football-ah chuan a mikhual dawn lo hle. Chutih rualin Watford hian season bul an ṭan fuh lo, point sarih chauh an la neih avangin a hna a harsa dawn.