OH PL!

Vivo Indian Premier League ṭhangduang tak chu ṭhang khat lian kan lo hmelhriat ve dawn ta reng mai. Infiamna khawvelah hian hamrik hnuhnung ber a rik hma chuan engmah hi chiang a awm lo ti ṭhin mah se, tun IPL 14-na hmawrbawkna tur erawh thil pakhat a chiang.

Nomawi la chawi lo pahnih Royal Challengers Bangalore leh Delhi Capitals te an tlak tak avangin hmel thar ni loin a tihdan riau lo thiam tawh team thoin ropuina ram an lut dawn, tih hi a chiang a ni.

League a 'leak'
Infiamna khawvel a inelna sang bera champion tur hian, kumpuilingleta league a khel ṭha ber, a daih rei berte hi champion-a puanna hmun an awm. Zofate hriat lar football inelna ngaihven hlawh Premier League, La Liga etc te hi entirna ṭha tak a ni thei ang.

Amaherawhchu league zawha a khel ṭha fal ho knockout round an buatsaih lehna hmun - basketball lama NBA te, cricket lama IPL te, football ngeiah pawh World Cup, Euro kan tih ang hi a awm leh bawk. Hetiangah hi chuan inelna hma lama an thil tawnin kawngro a su vak lo a, a tawp kharna final-a an chak zawk a nih chuan champion a puan an ni mai zel.

Tun IPL 14-na a team pariat zinga khel tluang leh kal ngil ber Delhi Capitals chu, knockout stage an thlen meuh chuan an tha a lo zuih hman nge ni? Ṭum hnih zet final khelhna hun ṭha hawnsak ni mah se an bawhpelh ve ve. Delhi hian season liam ta khan final-ah Mumbai Indians an hneh lo a, tun ṭumah league round-ah pakhatna ni mah se final khelh chu sawi loh, semifinal-ah an puanthuah an tel a ngai ta si.

Tournament rei leh inkhelh tamnaah chuan, a tira khelh ṭhat pup pup pawh ni chuang loin, a pawimawh hunlai taka a vawrtawp thleng thei (peaking at the right time) hi a ṭangkai ber an tih fo ṭhin, Chennai Super Kings leh Kolkata Knight Riders te khawsak dan hian a nemnghet mai awm e.

Chak lo tan chakna
Chhuak hmasa lama kan thailan tawh angin eliminator leh qualifier round-ah ah league lama che chhe zawk ve ve pahnihna Chennai Super Kings leh palina Kolkata Knight Riders-in an chunga awm pakhatna Delhi Capitals leh pathumna Royal Challengers Bangalore an tukzal ta si.

Chutah league table lama palina KKR-in qualifier 2-ah league round-a che ṭha ber Delhi chu Nilaini zan lamah Sharjah khelmualah an hneh leh tak si avangin, tun league round-a team vantlang Kolkata chuan zaninah champion-na hun ṭha an neih phah ta a ni.

Champion ngai lo Delhi leh Bangalore mangṭha a ngai ta. Final hmachhawn tur Mahendra Singh Dhoni leh a hote hi final an luh tawh chuan hnehna hlado chham dan an thiam. An khingpui tur KKR hi IPL 2012 leh 2014 final-a chak lo zawk tura ngaih (underdog) ni mah se nomawi an chawi ve ve. Tun ṭuma CSK leh KKR te dawhsan sang ber hmun inchuh tura an inkhuainuai tur hi a va nghalhlelhawm tak em!

Pitch Pitch Pitch
Karleh lawka ICC T20 World Cup thleng tura lo buatsaih UAE chuan, thawk leh khatah hnawhsaruma BCCI lam mangang ṭahawhna lo dawngsawngin IPL khelh bang laklawh tak chu hlawhtling takin an thleng.

Mahse, thil pakhat erawh a chiang, duhthusamin pitch a khawsa ta lo. Tun ang lai T20-ah chuan 160 runs pawh hi target atan chuan a tam tawk lo a, 180 runs chho vel an han um ṭhin erawh a hmuhnawm tawk hle. Kumin IPL-ah erawh 120/130 runs vel target an chhawp a, duhthusam chu ni pha chiah lo mah se a entlak viau thung.

UAE khaw lum leh ni sa lutukin pitch a em ro a, duh aiin a hlui hma a, batsman tan ball vuak pawp pawp a har ṭan a, fast bowler ball vawm kawh fua fua aiin, ball vawm zawi thiam, spin thiam an ṭangkai tan ta. A bikin tun qualifier 2 leh eliminator hnuhnung Sharjah Stadium-a an khelhah khan a chiang mai awm e.

Zanin Dubai-a final an khelh turah hian pitch lam buaipuitu curator ho 'puja' fuh tak maw?

We are the Champions!
Zanin final-ah CSK tana tun IPL 14-na a che hit ber zinga mi Ruturaj Gaikwad te, tawnhriat ngah Valupa Robin Uthappa te nge dingchang dawn tun inelnaa che ṭha KKR star pahnih Venkatesh Iyer leh Varun Chakravarthy te tih a hriat dawn ta. Inkhel pakhat chiah ni si hian team leh player mal dinhmun a va thlak danglam nasa dawn em. Infiamna khawvela 'Final' ropui danglamna i ti mai ang hmiang.

Khawvela cricket game hmawr bawk thiam bera chhal captain ropui Dhoni hian qualifier 1-ah finisher ṭha a nihzia a rawn pholang a, Delhi Capitals an hneh ṭumin over tawp berah four vawi li an rawn vaw chhuak. Dhoni hian a vawi li nan IPL nomawi hi Chennai khawpuiah hawn a tum dawn a, mah se KKR captain hi Eoin Morgan a ni.

Morgan hi ICC World Cup hnuhnung bera England champion puitu kha a ni a, a arsi bel tichhah turin IPL trophy hi Kolkata khawpuiah vawi thum nan hawn a tum ve thung dawn. KKR neitu zinga mi Shah Rukh Khan hi tun hnaia rilru hahna tur a ngah a, IPL nomawi hian a lungaihna ṭhenkhat a rawn hnem thei ngei ang. Kolkata, Park Street pheiah hnehna hlado chhamin nomawi an lampui dawn em tih chu a hriat thuai dawn.

Thil pakhat erawh zawlnei ianga puan lawk ka nuam e. Cricket ngainatute mit a tlai leh dawn a, lawm leh hrehawm tih avanga mittui far player leh fan-te an awm leh nual ang. Tin, ṭhumvawra chak zawk zawkin, vuak hnuhnun an thlang ngei ang?

Final en tui, mangṭha IPL 14-na.

- K. Vanlalruata