Mizo tlangvalin Mariana Trenching Challenge a zo

Mission Veng tlangval Vanlallawmzuala Varte chuan Mariana Trenching Challenge a zo a, he inelnaa Mizo tel hmasa ber leh tlan chhuak thei hmasa ber a ni.

Inelna hi thirsakawr khalh ṭhinte pual a ni a, a hautakzia leh harsatzia pawh hi thirsakawr khalh ṭhinte bawkin an hrechiang.

Mariana Trench an tih chu Pacific tuifinriata awm a ni a, 11,034 metres laia thuk niin tui chhunga khuarkhurum thuk ber a ni.

Cyclist-te chuan Mariana Trench hming chawi hian challenge an siam a, a hmingah Mariana Trenching challenge vuahin darkar 24 chhungin 11,034 m-a chho (elevation) tlan hman a ngai.

Mizo tlangval Lz-a hian Mission Vengthlang kawn aṭanga Shalom Baptist Biak In bulah kual chhukin, tlawng road lam pan thlain tlawng road a zuk pawh hnuin Jubilee Presbyterian Biak In, Mission Vengthlang lamah kual chho lehin Mission Vengthlang kawnah a lo chhuak chho a. Tichuan a route ngaiah bawk tlan zel a ni.

Vawi khat tlan chhuah hi 2.55 km vela thui a ni a, vawi khat tlan chhuaha elevation gain zat hi 154m a ni. Vawi 79 hel chhuakin elevation a thawhchhuah zat chu meter 12,181 lai a ni.

Elevation hi 11,034m mamawh mah se, 12,181m lai a tlan chhuak. Hetiang dinhmun thleng tur hian 200km lai a tlan a, darkar 24 chhung a hman theih laiin 15:56:29 hrs chauh a hmang. An hun hman dan record nan Strava apps an hmang.

Lz-a hian darkar 17:57 chhungin Chalfilh (229 km) chu MTB (Cycle) hmangin a lo lehlang tawh a; darkar 14:55 chhungin Thenzawl (203 kms) a lo lehlang tawh bawk.