Ramos tan nghah leh rih a la ngai ; Poch-a'n Messi chhawr thei dawn lo
Zanin dar 12:30 hian Paris Saint-Germain chuan Ligue 1 khel turin Angers an mikhual dawn, nipui bazar laia an lakluh Sergio Ramos chu a vawi khat nan chhawr theih an beisei hman zet a, mahse Spanish defender hi a la inlan dawn lo niin a lang.
PSG hian a zawnin league match riat chhung hnehna an chang a, chumi hnuah vawi khat an tlawm. Tun ṭuma an mikhual tur Angers hi palina ni lai an ni a, team ṭha an nih avangin Mauricio Pochettino tan fimkhur a ngai dawn.
Messi tel lo
Europe leh South America khawmualpui a inhlat a, World Cup qualifier khelh a nih hnua league match hmasa berah South America ram tana feh chhuakte chu an inlan thei ṭhin lo - tun ṭumah pawh inlan thei lo tur an ṭhahnem.
Zirtawpni zingah Argentina, Brazil leh Uruguay ten match an nei a, zan lamah PSG an inkhel zui dawn tihna a ni. Lionel Messi, Angel Di Maria, Leandro Paredes, Neymar, Marquinhos leh Keylor Navas te tan inlan hman ngaihna a awm lo.
Poch-a tan Messi leh player ṭhenkhat inlan lo tur hi channa lian tak a ni dawn, chutih rualin kar leh lamah Champions League an khelh zui dawn avangin hahchawlhna hun atan an hmang thei dawn a, a eng zawnga thlir theih a ni ve tho.
Inlan tur
Europe khawmualpuia ramte an inhnaih hlawm a, hun rei lo te te chhunga inzin pawh theih a ni; Thawhlehni zan khan ram tana an match hnuhnung an khel tawh hlawm bawk - Kylian Mbappe, Presnel Kimpembe leh Marco Verratti te chu zaninah chhawr theih an ni dawn.
Tun hnaia hlim tawk loa an sawi Georginio Wijnaldum pawh inkhel turin a inpeih. Liverpool midfielder hlui hi season tir lamah rinrawl a ni a, player an awmkhawm kim hnuah erawh bul ṭantu zingah a tel ta meuh lo, a ṭhat tawkzia lantir nan Angers hi hman a tum ang.
An squad chhahzia chhutin PSG hi chak tura rinkai an la ni tho, an inkhelhna tur hi Parc de Princes a nih bawk avangin player ṭha inlan thei lo tur awm nual mah se an zam lo ang, chutih rualin chesual ve thei tho an nihzia chu Rennes lakah kan hmu tawh - an fimkhur a ngai hle dawn a ni.
Ramos a chiang lo
Nipui bazar lai khan Sergio Ramos-a'n PSG a zawm a, mahse hliam a neih avangin tun thlengin Paris club tan match a la khel lo, a hliam dam tawh mah se team training pangngai a la zawm kim lo, chuvangin zaninah a inlan a nih pawhin minute a khel rei lo ang.
Spanish defender hian tawnhriat a nei ṭha, amaherawhchu Real Madrid tana a hun hnuhnung lamah pawh hliam vangin a buai a, kum 35 mi a nih tawh avangin ngaiawh leh a harsat dawn tih a chiang, a lakah erawh beisei an la nei.
Ramos bakah hian Layvin Kurzawa, Julian Draxler leh Ismael Gharbi te dinhmun a chiang lo bawk a, khup hliam dam hlim Juan Bernat erawhin training a neih tawh avangin Poch-a tan mamawh huna chhawr theih tur a ni tawh.