League One leh League Two a tawp

English football-a third division inelna League One leh fourth division inelna League Two chu tun season atan tihtawp a ni a, English Football League chuan Thawhlehni zana club-te ngaihdan a lakkhawm hnuah he thu hi a puang 

a ni. 

League One leh League Two table hi points per game hmanga siam zui a ni a, promotion leh relegation chu dan pangngai anga kalpuiin playoff pawh a awm tho bawk ang. 

EFL chuan, "Team tam zawkin league tihtawp an duh avangin a tawp ta a ni," tiin tun season atana League One leh League Two tihtawp chungchang chu an sawi. 

English third division-ah hian Coventry City chu champion-ah puan an ni a, an hnuai chiaha awm pahnihna Rotherham United nen season tharah chuan Championship an khel ang. 

Tranmere Rovers, Southend United leh Bolton Wanderers chu League Two lama tla thla tur an ni a, season kal laiah Bury FC chu tihtawp a nih avangin season danga pali relegate ṭhin chu tun season-ah erawh Bury a tawp sa avangin team pathum an relegate. 

Championship-a hmun ruak pakhat la awm chu Wycombe Wanderers vs Fleetwood Town leh Portsmouth vs Oxford United-ten playoff hmangin an zawng leh dawn a, playoff khelh hun tur erawh tihchian a la ni lo. 

League One lamah hian points per game dan tuar ber chu Peterborough an ni a, playoff khel thei dinhmunah ding mah se point khata anni aia hniam zawk Wycombe chuan an luahlan - Wycombe hian match khatin an khel tlem a, hei hian PPG lamah hian a puih phah. 

English fourth division lamah Swindon Town leh Crewe Alexandra chu an point hmuh zat inang mah se match khata khel tlem zawk Swindon chu champion-ah puan an ni a, Crewe leh pathumna Plymouth Argyle nen season tharah League One an khel ang. 

League One-a hmun ruak pakhat la awm chu Cheltenham Town vs Northampton Town leh Exeter City vs Colchester United ten playoff hmangin an zawng dawn a, playoff final hi June 29-ah Wembley-ah khelh hman tum a ni. 

English third division lama Bury an tawp tak avangin League Two-in a hlawkna an lo tel ve a, season tawpa a mawng pahnih relegate ṭhin chu pakhat chauh an relegate dawn. 

Tun dinhmunah Stevenage chu relegate tur anga lang an ni a, mahse an chung chiaha awm Macclesfield Town chu players hlawh pek loh chungchangah thubuai siamsak an nih avangin  Macclesfield zawk hi relegate thei dinhmunah an la ding.