Milan defender Hernandez a chawlh a ngai

France tana a fehchhuahna lamah Theo Hernandez chuan Covid-19 a kai a, a club khelh mekna AC Milan chuan an player hian hripui kai mah se natna lang chhuak erawh a neih loh thu an sawi a, tun kartawpa Serie A khelh turah erawh an chhawr thei lo ang.

Mual sir vei lama khel ṭhin Hernandez hian France tan hmun pawimawh a chang chho a, Nations League match hnih an khelhah bul ṭan ve vein, goal a khung bakah assist a nei bawk - an champion theih nan a thawh hlawk hle.

Hernandez bakah hian France player zingah Juventus midfielder Adrien Rabiot chuan hri leng a kai tih hriat chhuah a ni ve bawk a, ani pawh hian tun kar tawpah Old Lady tan match a khel thei dawn lo.

Milan hian tun hnaiah an keeper pakhat Mike Maignan chu banrek hliam vangin an chan a, chawlh kar 10 chhung vel a inkhel thei dawn lo. Maignan hmun ruak luah tur hian club nei loa awm lai Antonio Mirante chu an la fel thei ve thung a ni.