Medvedev hnehtu Dimitrov

US Open champion Daniil Medvedev chuan Grigor Dimitrov a hneh lo. Indian Wells Masters last 16-ah Medvedev hi 4-6, 6-4, 6-3 in a chak lo a, a inkhelh thiamna hmun hard court-ah a zawna nomawi chawi a tumna chu a thamral.

Nimin zing inkhelah Medvedev hi chak zawk tura rinkai a ni, mahse tun hma lama player ṭha leh langsar zawkte lo hneh fo tawhtu Dimitrov a che buai duh bik lo; Bulgarian star hian 2016 Miami Open-ah khan seeded pakhatna Andy Murray pawh a lo hneh tawh.

Seeded 23-na Dimitrov hian a vawi khat nan Indian Wells Masters-ah hian quarterfinal a lut ta a, semifinal thleng tur chuan Hubert Hurkacz a hneh leh a ngai dawn, inkhel dangah Hurkacz hian Asian Karatsev chu 6-1, 6-3 in a lo hneh ve thung a ni.

Kum 30 mi Dimitrov chuan, "Kuminah ṭha tak taka khelh chang nei mah ila ka vanduai leh ṭhin, uiawm taka tlak ka nei fo. Tun ṭumah erawh a vannei zawkah ka ṭang ta, hetianga khelh zel hi ka duh," tiin a sawi.

Chak lo Medvedev tan erawh North America khawmualpuia a record ṭha tak a tawp rih. Russian star hian season kal laiah Toronto Open nomawi a chawi a, Cincinnati Masters semifinal a luh hnuin US Open nomawi a chawi, tunah erawh last 16 a paltlang thei ta lo.

World number 2 Medvedev chuan, "Inkhelh chhunzawm leh nghal chu ka duh, mahse ka taksain a tlin rih lo ang," a ti. Kar leh hian Moscow khawpuiah inelna a awm dawn, an ramah Medvedev hi a inlan thei dawn lo niin a lang.

Medvedev a tlak takah chuan hmeichhe number 1 Karolina Pliskova a tla tawh bawk a, Grand Slam dawta inelna lian ni mah se Indian Wells-ah hian quarterfinal hmain mipa leh hmeichhe seeded pakhatna an tla ve ve tawh tihna a ni.

Mipa singles inkhel dangah Diego Schwartzman, Cameron Norrie, Nikoloz Basilashvili leh American Taylor Fritz te chuan an khingpui ṭheuh hnehin quarterfinal an in vaw kai ve bawk.