Foster-a'n contract pawt sei

Premier League club Watford goalkeeper Ben Foster chuan season hnih daih contract a ziak thar a, inremna thar an neih thu hi Thawhlehni khan club lam chuan an puangzar

Kum 37 mi Foster hian tun thla tawp thleng daih chiah hi Vicarage Road-ah contract a nei tawh, inremna an neih takah chuan season an khelh chhunzawm leh hunah pawh rilru nghet takin match a khel zui thei ang.

England international hlui hi kuminah Watford tan player pawimawh ber zinga mi a ni, league match 29 an khelh tawhah bul a la ṭan vek. Save vawi 89 nei tawhin goal chhuah lohna inkhel (clean sheet) pawh vawi kua a nei tawh.

Foster chuan, "Table hnuai lamah team inel kan tam a, a laihawla awm chunga season khar tur chuan kan elpui club pasarih vel kan khum a la ngai dawn. Relegation zone aṭanga kan himna chu goal difference chauh a ni a, match kan neih leh hmasa ber aṭangin thapui kan thawh ang," a ti.

EPL table-a 17-na nilai Watford hian hripui Covid-19 len hnua an match hmasa ber atan June 20, Inrinni hian Leicester City an mikhual ang.