Man United-ah Pogba a hlim thei lo - Deschamps

France-in zanin dar 1:40 hian friendly match-ah Finland an hmachhawn dawn a, hemi zawh hian Nations League-ah Portugal leh Sweden te nen an inkhel zui dawn.

Les Bleus coach Didier Deschamps chuan Manchester United-ah a player pawimawh Paul Pogba a hlim loh thu a sawi chhuak a, sawi zui a hlawh hle.

France-in World Cup 2018 an champion theih nan Paul Pogba a langsar a, a thiamzia leh ṭhatzia sawi nep theih a ni lo. Didier Deschamps pawhin a theihna hriain Manchester United tana a khel tam tawk lo chungin Finland, Portugal leh Sweden hmachhawn tur squad-ah a tel.

Deschamps chuan, "A khelh hun emaw a position-ah emaw Paul Pogba tan club-ah lungawi theih a ni lo," tiin English club-in a player pawimawh an chhawr danah a vuina hle.

France coach chuan sawi chhunzawmin, "Pogba tan hun duhawm a ni lo. Inhliam vangin a buai a, Covid-19 positive vangin harsatna a nei leh bawk. A ṭhat dan bera khel chho leh turin hun a mamawh. Keimah bikah erawh harsatna ka nei lo. Player hi an club khelhnaa an lungawi lo a nih pawhin France tan hlim takin an khel thei ṭhin," tiin a sawi.

Les Bleus hi October thla khan Portugal nen an inkhel a, goal awm loin an inhnehtawk. Deschamps hian Pogba hi Portugal lakah bul a ṭantir a, Croatia 2-1 a an hneh ṭumin bench aṭangin a luhtir leh bawk.

Deschamps chuan, "Paul hian a rilru tak tak min hrilh a, amah ka hrechiang bawk. Kawng dik chu a zawh leh ngei ang," tiin a sawi.

Manchester United-in kum 14 mi Paul Pogba chu kum 2009 khan Le Harve aṭangin an lalut a, English club-ah a theihna sang sa chu a chher hriam belh. French midfielder hian FA Cup Youth Cup-ah United a champion pui a, amaherawhchu hlawh leh khelhna hun chungchangah Sir Alex Ferguson nen inrem theih loh avangin kum 2012 khan Juventus a zawm.

Italian club-ah Pogba-a'n hming chherin Serie A nomawi pawh vawi li zet a chawi pui a, World Cup 2014-ah pawh best young player-ah thlan a ni. Jose Mourinho-a'n Man United a enkawl khan team siam ṭhat nan Paul Pogba hi kum 2016 khan pound maktaduai 89 in a la let. 

Pogba hian Man United hi Europa League leh League Cup-ah a champion pui a, record chhia ni lo mah se Old Trafford-ah hian a theihna ang takin a la khel chhuakah ngaih a ni lo thung.

Mourinho-a'n a hna a chan chhanah Pogba a inrawlhah a ngaih theih a, French midfielder hian khelmual pawnah buaina a ngah hle. Bruno Fernandes awm hnuah Pogba hlim chho mah se season liam ta tawp lam aṭang khan buaina a nei chho leh ta.

October thlaa international break a awm khan Pogba chuan, "Real Madrid tana khelh hi ka duhthusam a ni," tiin a sawi a, hemi hnu hian United-in French midfielder hi kum khat atan a contract an pawhseisak. Tuna hian kum 2022 thleng Pogba hian contract a nei mek.

Kum 27 mi Pogba theihna sawi nawn a ṭul tawh lo a, United tana a khelh dan erawh sawi zui theih tak a ni thung. Tun season-ah United-in match 12 an khel tawh a, Pogba hi vawi hnih chiah la khel tluanin an chak lo ve ve.

French midfielder hian vawi nga bul ṭanin vawi thum an chak lo a, vawi hnih chauh an chak. United hi Pogba inlan lohna inkhelah an chak a, substitute aṭanga a luhna inkhel parukah vawi li an chak a, chak loh leh inhnehtawk vawi khat ve ve an nei bawk.

Chelsea player hlui Joe Cole chuan, "Tumahin (Fred & Mctominay) Paul Pogba theihna ang an nei lo, amaherawhchu tuna an khelh danah chuan Pogba tel loin Bruno tan a ṭha ber. Bruno hi United best player a ni," tiin a sawi a, Ole Gunnar Solskjaer-a'n bench a Pogba a dah chu a hriatthiam pui.

Manchester United legend Roy Keane pawhin, "Pogba hi kum eng emaw zat chhung chu a theihna angin a khel chhuak tawh lo. Tharum a pawimawh thu kan sawi a, Man United tan chuan tharum ringawt a tawk lo. Fin a ṭul a, huaisen a ngai a, thinlung taka khelh a ṭul. Pogba hi theihna chu a nei a, mahse a thawk ṭha tawk lo. Thinlung takin a khel lo," tiin Pogba hi a ṭangkai tawk loh thu a sawi.

Roy Keane leh Joe Cole ten Pogba a ṭangkai tawk lo thu an sawi a, chutihrualin Pogba hmang thiamtu Deschamps thusawi a dikna chen a awm. Bruno Fernandes a awm avangin Pobga hi midfield vei lamah dah a ni a, khelhna hun pawh a chang tawk lo. French midfielder hi minute 1080 khelh tur awmah minute 527 chauh a inlan.