Pep thawhpui tur Lillo

Manchester City chuan an manager Pep Guardiola thachhang dawl turin Juan Manuel Lillo an lalut. Pep leh Lillo te hi tun hmain an lo inhre sa tawh a, assistant manager chhuak ta Mikel Arteta hmunruak a luah dawn a ni.

Lillo hian team enkawl lamah sulhnu a nei nual - Real Sociedad, Vissel Kobe leh Real Oviedo te chu a lo kaihruai tawh ṭhin. 2006 khan Dorados de Sinaloa a enkawl, Mexican team-ah hian Guardiola chu player niin a kaihruai hman a, hliam vangin a inlan tam lo thung.

Kum 54 mi Lillo chuan, "Pep nena kan inhriatna hi chu a rei tawh, tunah chuan ani nen hna hlimawm tak kan thawkdun tur hi ka lawm," tiin a hna thar turah a phur thu a sawi. A contract rei zawng chu tarlan a ni lo.

Guardiola enkawl Man City hian Premier League nomawi an kawl lai chu Liverpool lakah an chan dawn niin a lang tawh a, coronavirus len hnua an match hmasa atan June 17 zan hian Etihad Stadium-ah Arsenal an mikhual ang.