Griezmann goal hmangin Atletico champion

Atletico Madrid chuan Marseille chu 3-0 a hnehin a vawi thum nan Europa League-ah an champion.

Nilaini zan inkhelah Spanish club tan hian Antoine Griezmann chuan goal hnih a khung hnuah captain Gabi-a'n chak nemnghehna goal khat a khung ve bawk.

Man of the match atana thlan France forward Griezmann tan Atletico Madrid a zawm hnua a nomawi chawi hmasak ber a ni a, season tawp ruala Atletico chhuahsan tur Fernando Torres tan pawh a sei lenna club tana a nomawi lian tham hmasa leh hnuhnung ber a ni nghal.

Griezmann goal hnih
Parc Olympique Lyonnais-a inkhelah Ligue 1 club lamin bul an ṭan fuh zawk a, forward Valere Germain-a'n box chhungah hun ṭha nei mah se goalkeeper Jan Oblak chiah a hmachawn tawhah a pet out hlauh a, ball thiam Dimitri Payet pawhin goal zawnah a pet thei lo a ni. France international hi a malpui hliam vangin minute 32-na lekah lakchhuah a ni.

Hrem vangin manager Diego Simeone-a'n khelmual sir aṭangin a naute ho khawm thei lo mah se an buai zui lo. Marseille keeper Steve Mandanda ball pet chhuah chu midfielder Zambo Anguissa-a'n a dawngsawng fuh lo a; Gabi chuan lo dawng zuiin a hma a awm Griezmann tan a lir lut nghal a, France forward tan goal hmahruai khung turin hna harsa awm tawh lo.

Second half-ah pawh Griezmann bawk a langsar, midfielder Koke hnen aṭanga a ball hmuh chu box chhungah tlan lupuiin mawi zetin a thlawh lut. Hun tawp dawnah Gabi-a'n cool zetin goal sirah a hlap lut bawk. Atletico hian 2010 leh 2012 khan Europa League-ah an champion tawh a, tuna a vawi thum nana nomawi an chawi leh takah chuan record nei ṭha ber Sevilla an nihrual chiah.

Atletico an lian
Atletico Madrid hi tun hnaiah chuan European club hlauhawm berte zingah an tel phak. Simeone-a naute hian Barcelona leh Real Madrid te khumin 2013-14 khan La Liga nomawi an chawi a, Spanish club lian leh hausa pahnih chunga awm hi thil namai lo tak a ni.

Tun season-ah pawh league match vawi khat khelh tur la nei chungin pahnihna an ni a, a zawna a season ruk nan a sang pathum zinga tel chungin kum tawp an hmang dawng–heng hun chhung hian Champions League final vawi hnih an khel bawk.

Atletico-in tun season inelna hrang hranga goal 30 khung thei Griezmann an nei a, champion pui tham khawpa thiam a ni–ani hian semifinal-a Arsenal an hmachhawn ṭumin khualmualah goal pawimawh a khung bawk. Tlarhma an neih ṭhat rualin an tlarhnung phui hi inchhuanna tham a tling, match 58 aṭangin goal 33 chiah an chhuah!

Pathianni zan hian Eibar nen an inhmachhawn dawn a, he inkhel hi Barcelona nen a sawi zawm lai Griezmann tan Atletico player a nih laia a match hnuhnung ber ni thei tura sawi a awm. France international Griezmann chuan, "He hun hlimawm ka tawn theih nan hian kum 14 mi lek ka nih laiin kan in ka chhuahsan a ngai a, tunah hian ka chhungte awmna hmunah nomawi kan chawi thei a, ka hlim takzet," tiin a sawi.

Torres a lawm
Atletico Madrid aṭanga inzir chhuak, senior career pawh Atleico aṭanga bul ṭantu Fernando Torres chuan Europa League nomawi an chawi ta chu a duhthusam thleng dik a nih thu a sawi chhuak bawk.

Kum 19 mi lek a nih laia Atletico captain ni thei Torres hian Liverpool leh Chelsea a zawm san hnuah a hmangaih hmasa ber hnenah a kir leh a, tun dinhmunah kum 34 mi ni tawh mah se Atletico a hmangaihna a la nep chuang lo–Marseille an hneh ṭum hian hun tawp dawnah Griezmann thlakin a rawn lut a, mipui lawm a hlawh hle.

Spain international Torres chuan, "Ka naupan lai khan engtikah emaw chuan Atletico nen hian nomawi ka la chawi ang tihin duh thu ka sam ṭhin a, tunah chuan a takin a thleng dik ta. Hun tawp hman dan duhawm leh ropui a ni a, he team-in hna ropui tak a thawh hi ka hre reng tawh ang," tiin a sawi.