Asia khawmualpui inelnaah Aizawl FC an chak
Aizawl FC-in Nilai zan khan tun season khar nan Indira Gandhi Athletic Stadium, Guwahati-ah Maldives club ṭha New Radiant SC chu 2-1 in an hneh a. Mizo club hnehna avang hian Abahani Dhaka 4-0 a hnehtu Bengaluru FC-in inter-zone playoffs semifinal an khelh theih phah bawk.
Mizo club hi NorthEast club zinga Asia khawmualpui inelnaa inlan thei hmasa hmasa ber an ni a, hnehna chang hmasa ber an ni leh a, Aizawl FC hian football kaltlangin Mizoram an tihmingṭha hle.
Inkhelh hma boruak
Bengaluru FC leh New Radiant ten point 12 ve ve an hmu a, head to head-a ṭha zawk Maldives club tan stage sang zawk thleng turin chak a tawk. Aizawl FC kutah AIFF Super Cup champion Bengaluru FC an innghat.
Mizo club tan erawh beisei tur a awm tawh lo a, an chung chiaha awm Dhaka Abahani chu head to head-a an phak loh avangin point thum pawh hmu se table mawngphah an chhuahsan thei tawh lo. Amaherawhchu, Aizawl FC hian point thum hmangin Mizo hming an tiṭha thei tih an hria a, chu chu an khelh chhan ber a ni.
Mizo hmel a ṭha
Aizawl FC-in Maldives-ah New Radiant 3-1 in an hneh lo a, Guwahati-ah pawh chak lo tur zawka ngaih an ni a. Mizo club result-in Bengaluru FC hmalam hun a hril avangin Indian football fan-ten inkhel hi an ngaihven.
Mizo club coach Santosh Kashyap-a'n I League-a a player pawimawh H. Lalmuankima leh Lalchhawnkima te chhawr thei lo mah se tawnhriat nei ṭha S. Malsawmtluanga leh Hmingthanmawia (Valpuia) ten hming chherna hun atan an hmang. Ṭum dang zawng aiin Mizo club-in an khel ṭha a, first half-a goal a luh loh hnuin man of the match-a thlan Andrei Ionescu-a penalty hlawhchhuah chu Leonce Dodoz-a'n minute 61-naah goal-ah a chantir a, minute 82-naah Aizawl FC-in counter attack hmanga vaw letin Romanian midfielder Andrei hian goal mawi khung nan a hmang.
Aizawl FC-in goal hnih an khung hnuah Ibrahim Atheeg Hassan hmangin New Radiant-in minute 85-naah an siphurh an sut ṭhen a, goal dang luh belh tawh loin Mizo club 2-1 in an chak.
MPL club coach Santosh Kashyap chuan, "Season kharna inkhela kan khelh dan a lungawithlak. Kan khelh dan thlak a, khelmualah a hlawhtlinna a lang. Kan lawmna belhchhahtu chu kan result avanga Bengaluru FC-in stage sang zawk an thleng hi a ni a, Asia khawmualpui inelnaah Indian hming kan chawi sang a ni," tiin Vanglaini a hrilh.
A hunah BFC
Bengaluru FC coach Albert Roca-a'n bul ṭantu zingah Mizo keeper Lalthuammawia Ralte a tel a, Champhai tlangval hian Bangabandhu Stadium-ah goal a venghim tluan.
Tlarhma lam pawhin an tihtur an ti a, minute 13-na lekah Spanish forward Daniel Segovia chuan Bengaluru goal hmahruai a khung a. Mikhual tan Nishu Kumar chuan 16-na leh 58-naah te goal a khung a, captain Sunil Chhetri-a'n minute 60-naah goal lina a khung leh bawk.
Chatlang tlangval Malsawmzuala pawh bench aṭangin a tlanlut a, Bengaluru FC-in 4-0 a hnehna changin inter-zone playoffs semifinal an khel dawn. Indian club bakah hian Turkmenistan club Altyn Asyr FK leh North Korea club April 25 Sports Club ten playoff semifinal hi an thleng ve tawh a, hmunruak pakhat hi ASEAN Final-a Singapore club Home United leh Philippines club Ceres-Negros chak zawkin an hnawh khat ang.
BFC coach Albert Roca chuan, "Kan team hi chuan inelna zawng zawngah nomawi chawi tumin theihtawp kan chhuah a, AFC Cup-ah hian kawng thui tak kan zawh tawh a, ṭha taka khar kan tum ang. Season harsa tak a ni a, kan hman zawh danah kan lawm," tiin a sawi.
Bengaluru hian AFC Cup-ah khelh tur la nei mah se 2017-18 season chu a tawp ta a, team thar nen August thlaa khelh tur inter-zone playoffs semifinal hi an hmachhawn thei ang. BFC hian kum 2013-a an club din a nih aṭangin season tinin nomawi an la chawi ziah a, kuminah a vawi khat nan Indian Super Leauge khelin league round-ah pakhatna an ni a, final-ah Chennaiyin FC hneh loin tlawm mah se AIFF Super Cup-ah an champion.