Remsiami'n vaw goal, India-in final lut
Asian Hockey Federation buatsaih Asian Hockey Champions Trophy 2017 khelh mekah India nulate chuan final an lut. Champion lai India hian nimin khan Malaysia 3-2 in an hneh a, Mizo tleirawl duhawm Lalremsiami chuan goal khat a vaw lut.
Sunrise Stadium, South Korea-ah India hian nimin khan an match thumna an khel a, Siami bakah hian Gurjit Kaur leh Vandana Katariya ten goal an khung a, chak lo zawk Malaysia tan Nuraini Rashid leh Hanis Onn ten hun tawp dawnah goal an khung bawk. Inelna neih hmain Indian hian frieldly match-ah Malaysia hi 6-0 in an lo sawp tawh bawk.
India hian an match hmasa berah Japan chu 4-1 in an sawp tawh a, Nilani zan khan match hnihna khelin China chu 3-1 in an hneh. China lakah India tan Vandana Katariya-i chuan goal hnih a vuak luh bakah Gurjit Kaur chuan penalty corner chawr ṭangkaiin an goal thumna a khung ve bawk a ni.
Kolasib tleirawl Siami telna India team hian league round-ah point kua hmuin hmahruiatu an ni chiang tawh a, Inrinni hian a thlengtu South Korea nen an league round hnuhnung ber an khel dawn, final hi Pathianniah final khelh zui tur a nih avangin player ṭha an hahchawlhtir thei tawh ang.
India skipper Sunita Lakra chuan, "Kan khel ṭhain hnehna kan chang zel a, chutih rualin duhthusam erawh a la ni lo. Kan tihdik loh leh fuh tawk lo lai kan zir chiang leh ang," tiin champion tur chuan hmasawn an la ngaih thu a sawi.