Buffon leh Juventus an inṭhen dawn

Gianluigi Buffon chuan nimin tlai khan Inrinni zan dar 6:30-a Verona an mikhual tur chu Juventus tana a match hnuhnung ber a nih tur thu a puang.

Khawvel goalkeeper piang tawh zinga ngaihsan hlawh ber ang hiala sawi theih Buffon hi tun season tawp ruala inkhelh chawlhsan tura ngaih ni mah se ni 15 liam ta khan a thutlukna a thlak a, a hmalam hun tur a la tichiang lo.

Kum 40 mi Buffon chuan, "Ni hnih thum chhung chu fianriala inngaihtuahna hun ka hmang ang a, ka hmalam hun tur chungchanga thutlukna ka siam ang," tiin a sawi a, sawmna ṭha tak tak a la hmuh thu a sawi lang bawk.

Juve a fak
Buffon chuan, "Juventus chhung­kaw chungah lawmthu ka sawi. Kum 2001 khan theihna nei sang tak keeper an lalut a, he theihna hi tipungin champion player-ah an chhuah a, hetianga min siamtu chu he club hi a ni," tiin a sawi.

Hetah hian a la duh tawk lo, Italian keeper chuan, "Inpekna kawngah te, ka khelh dan bakah ka rilru put hmang thlengin hmalam kawng min zawhtir a. Kum 40 thlenga ṭha taka ka khelh theih chhan hi anmahni vang a ni a, kalphung hi khawvel club dang nen a dang. Nomawi dah ṭha ila, Juventus aṭanga ka thil zirchhuah hi a hlu a, ka lawm kumkhua tawh ang," tiin club chungah lawm thu a sawi.

Hmalam hun
Italian keeper Buffon hi Parma aṭanga inzirchhuak ni a, amaherawhchu let leh a tum tawh lo. Buffon chuan, "Parma-a let leh ilang chuan thawnthu ngaihnawm tak a ni ang a, a bak a awm belh lo," tiin league hniam zawkah khelh a tum lo a, tun dinhmunah Parma hi Serie B-ah an awm mek.

A hmalam hun chungchanga thutlukna a siam dan sawiin Buffon chuan, "Ni 15 liam ta kha chuan player chawlh tawh ang mai ka ni. Tunah erawh ka chiang leh tawh lo. Player la ni chhunzawm tura sawmna bakah khelmual pawn atana sawmna pawh ka dawng a, chung zinga pawimawh ber chu Juventus aṭangin a ni," tiin a sawi.

Buffon hian Juventus hi Serie A-ah a zawnin vawi sarih a champion pui a, Coppa Italia-ah vawi li a champion bawk. Italy tana khel tam ber niin vawi 176 a inlan tawh a, World Cup khel tura an tlin zawh loh hnuah nikum November thla khan ram tana inkhelh a chawlhsan a. June 4-a Azzurri nen friendly match an khelh hunah pawh a tel lo tur thu nimin hian a sawi lang leh bawk.