Indian football hmel a danglam dawn? AFC ruahmanna siam a pût ru

India rama football kalphung mumal loh zia inhrilh nawn kan ngai lo. League sang ber pawh nei mumal loin kan awm a, I League leh Indian Super League chu kan league neih pahnih an ni.

All India Football Federation-in I League chu league sang ber a nih thu sawi ṭhin mah se sum tamna leh mipui ngaihven zawk chu Indian Super League a ni reng a, Indian footballer langsarte pawhin I League aiin ISL an thlang zawk.

India coach Stephen Constantine-a'n tun hnaia Hero Intercontinental Cup khel tura probables squad a puan player 30 aṭang ngawt pawhin ISL-in ngaihhlut a hlawh zawk tih a lang - player pali chiah I League aṭanga koh an ni.

Tichuan...
India ram football inrelbawlna fuh loin a nghawng chu sum tam tak senga club dintute an ni a, Indian football-in hei hi a tuar bawk. I League club neituten thawm bengchheng tak tak an nei reng a, hei vang hian Asian Football Confederation chuan AIFF chu Indian football kalphung mumal taka duang turin an ti.

AIFF leh AFC indawr hnuah AFC aiawhten Indian football an zirchiang a, a kal zel dan tur ruahmanna an siam - kum liam ta chhung khan India ram hmun hrang hrangah an zinkual a, coach, player, club neitute leh football hruaitu engemawzat an kawm kual.

AFC hian he zirchianna aṭang hian Indian football kal zel dan tur an duang fel a, hei hi AIFF hnenah thehluh tur a ni - mahse he lehkha hi a hun hmain a put ru a, AIFF lam erawh chuan he lehkha put ru hi engmah lo mai a nih thu an sawi a, hei erawh in phat mawina mai a ni.

Lehkhabu chu
AFC ruahmanna hi a hmingah "The Sustainable Development of Top Level Indian Club Football - A Road Map." (Club football-a Indian football hmasawnna tur - Rua-hmanna) tih a ni a, Alex Phillips leh Nic Coward ten hming an ziah hnan.

Alex Phillips hi AFC-a Head of Asia-Europe Affairs a ni a, Nic Coward hi FIFA hnuaia Football Consultant a ni thung. AFC aiawh mi pahnihte hian Indian football kal zel dan tur hi an duang a, AIFF-a thehluh a nih hmain a put ru ta a ni.

He ruahmannaah hian India rama league kalphung mumal zawk neih a nih dan tur te, a hman ṭan hun turte leh engtika hman tur nge tihte tarlan a ni.

League pakhat
Report-a a lan dan chuan 2019-20 ah Indian football chu top league pakhat chauh nei tura beisei a ni a, 2021-22-ah chuan team 16 tal awm tawh tura beisei a ni a, he season aṭang hian relegation awm tura tih a ni bawk.

AFC lekha put ru, phek kuanaa tarlan a nih danin 2021-22 season-ah hian team pahnih an relegate ang a, second division aṭangin pahnih an kaisang bawk ang. Mahse, AIFF-in ISL-ah kum 10 chhung relegation awm lo tura inremna a lo neihpui tawh avangin club pahnih relegate hi a theih loh mai thei - he mi chinfel dan tur hi AFC chuan an duang nghal.

2021-22 season-ah hian team pahnih relegate tir a harsa a nih chuan top league-ah hian team 15 awm mai se, second division champion erawh promote tho ni se, 2022-23 season aṭangin ruahmanna hmasa zawk hi hman ni se, tih a ni.

Mahse maw...
Tun dinhmunah ISL khel turin promotion kalpui a ni lo a, ISL enkawltu Football Sports Development Ltd-in tender chhuahin 'franchise fee' hmangin club an in lei tling ṭhin a, hei hi sum hmuh nana an hman pakhat a ni.

Hei hi thaibo tawp a harsa mai thei a, mahse he inelnaa team 16-an nih season tur (2021-22 emaw 2022-23) hma zawnga club chuan 'participation fee' an pek a ngai a, mahse promotion hmanga inhlangkai erawh an fee a tlem bik thung ang.

Tun dinhmunah franchise fee hi vaibelchhe 10-15 inkar a ni a, promotion club, heti zat sum pe lo chuan ISL sponsorship aṭanga sum sem turah franchise fee dik taka pe te aiin sum an dawng tlem thung ang. AFC chuan AFC leh FIFA aiawh awmna League Transition Commission din turin AIFF an ti a, hei hian he ruahmanna hi an bawhzui ang.

Thank you Ambani
AFC chuan sum tam tak seng a, Indian football hmasawnna tura theihtawp chhuahtu IMG-Reliance an fak a, Ambani chhungkua chu Indian football hmasawnna tura thawk zel turin an ngen.

Lehkhaa an tarlan dan aṭang chuan AFC chuan Reliance chu Indian football-a sumdawnna leh thil danga inrawlh zel turin an beisei a, mahse tier 1-ah chauh insawrbing loa tier-2 pawh enkawl turin an duh - AIFF chuan thuneihna pumhlum erawh a nei tho ang a, kawng engkimah an inrawlh erawh a ngai dawn lo thung.

A tawi zawnga sawi chuan AIFF chuan thuneihna tawp a la nei reng ang a, mahse league hmasawnna, sumdawnna leh thil dang dang Reliance-in a enkawl ang - Indian FA thawh ve tur chu a venpui hna a ni ber.

AIFF puanna!
AIFF-in ISL an din tirha an sawi chu I League chu top league a la ni reng tih a ni a, ISL chu hun rei lo te chhunga Indian football vawrh lar nana hman tur remchang anga sawi a ni - mahse AFC lehkhaah erawh AIFF hian IMG Reliance chu ISL hi India rama league sang ber ni thuai turin inremna an lo neihpui reng tih a lang!

AFC chuan Super Cup chungchang an sawi lang bawk a, Bengaluru an champion-na tournament hi tun season khan ISL leh I League club ten a vawi khat nan an khel a, champion tan kal zelna tur chuang a awm lo - hei vang hian player tam takin an sawisel.

Ruahman dan chuan 2018-19 season chu league pahnih hi a la kal kawp phawt ang a, I League champion-in Champions League qualifier an khel a, ISL champion-in AFC Cup qualifier an khel thung. AFC chuan Super Cup hi Asia club inelna chinfelna ni turin an duh a, hei hi AIFF hian an zawm thei lo a nih chuan Asian club competition-ah an tel phal sak an ni lo ang!

Foreign player tlem
AFC chuan mi an kawm apiangin India rama league pakhat neih an duh thu an sawi zel avangin an lawm thu an sawi a, hetihrual hian foreign player chhawr theih zat tih hniam an rawt tel bawk.

ISL-ah ram pawn player pariat squad-ah neih theih a ni a, pangain inkhel bul an ṭan thei. I League lamah foreign player paruk zel squad-ah neih theih a ni a, panga chu starting XI-a tel thei an ni.

AFC Club Competition zula foreign player neih theih chin siam turin AIFF chu beisei an ni a, chumi awmzia chu club tinin ram pawn player pali (pakhat chu Asian a ni tur a ni ) ṭheuh bak an nei thei tawh dawn lo tihna a ni a, hei hian tualchhung player-te hmasawnna kawngah a pui ang.

Ruahmanna dang
AIFF chu player-in register-na tur pakhat nei tura tih an ni a, contract chu AIFF-ah in register zel tura tih a ni bawk. State FA te pawhin registration system mumal takin an kalpui ang a, hei hian player pakhatin registration hrang hrang a neih ṭhin chu a titawp ang.

Hei hian club 'tenau', an academy chhuak player hralh ṭhinte chu 'transfer fee' pangngai tak a hmuhtir thei ang a, tin player-ten kum rei zawk atan contract an ziak ve thei ṭhin bawk ang. Hei bakah hian AIFF chu Football Players' Association Of India ṭha lehzuala thawhpui tura tih an ni bawk.

AFC chuan AIFF chu State Association Licensing system kalpui turin an ti bawk - a hrilhfiah dan awlsamah chuan I League khel tur chuan club-ten dan zawmkim tur an nei a, AIFF hnuaia awm turin State FA pawhin dan zawm tur an nei ve tawh ang. Hei hian Indian football ṭhanna kawngah nasa taka a puih beisei a ni.