England captain tur a la chiang lo

Nilaini zana England World Cup squad puangtu coach Gareth Southgate chuan nimin tlai khan squad a puan hnua a vawi khat nan press conference a nei a, Russia-a England captain tur a la chian loh thu a sawi.

Southgate chuan, "Pathianniah kan inhmu khawm ang a, chumi hnu lamah captain tur chu kan la chingfel ang. Team chhungah tupawh hruaitu ṭha ni thei tura inchher hriamna hun kan hmang chho a, kan inhmuh khawm leh hunah captain tur chungchang chu kan la sawi leh dawn a ni," a ti a, Jordan Henderson, Harry Kane leh Eric Dier chu captain ni thei tura rin an ni.

English manager hian player langsar zingah Joe Hart leh Jack Wilshere a ko lo a, Southgate chuan, "Hart tan tun hi tawpna a la ni lo a, he team-ah hian a rawn kir leh thei ngei ang. Jack hi Krismas hma zawng khan a khel ṭha a, tun hnaiah erawh beisei a phak lo a ni," tiin player pahnih a koh loh chhan a sawi.

Southgate chuan keeper a koh pathum Jack Butland, Nick Pope leh Jordan Pickford chu Premier League-a English keeper ṭha ber an nih thu a sawi a, koh zinga mi Trent Alexander-Arnold, Ruben Loftus-Cheek leh Jesse Lingard te ang thoa tawnhriat nei tlem vek an ni.

Three Lions manager chuan, "Player naupang tak tak kan koh chhan chu an position-ah an ṭha bera kan hriat vang a ni mai. Ram tana la inlan tam lo player koh hi a huaisen thlak inti a ni mai thei a, mahse hemite hian kan rinna hlawhchhuah hi an phu a ni," a ti.

Southgate chuan Newcastle midfielder Jonjo Shelvey chu a nungchang vang ni loin a aia ṭha an awm avanga ko lo a nih thu a sawi a, hliam vanga tun season-a match 14 chiah khel Adam Lallana chu a ṭhat dan bera khel tura hunin a daih tawh loh avanga ko lo a nih thu a sawi bawk.