Rome-ah player langsar an chak

Italian Open khelh mekah mipa player langsar ten hma lam an pan zel a, Rafael Nadal, Novak Djokovic leh Alexander Zverev ten hnehna an chan laiin Dominic Thiem erawh a zinkawng a tawp thung.

Nilaini zan inkhelah kum 31 mi Nadal-a'n harsatna a tawk lo. Monte Carlo leh Barcelona Open champion hian Damir Dzumhur chu 6-1, 6-0 in a sawp, set khatna la turin minute 34 chiah a mamawh a, set hnuhnung zawkah phei chuan game khat pawh hloh loin a tlang nghal thei a ni.

Grand Slam vawi 16 champion tawh Nadal hian a match leh pekah Denis Shapovalov a hmachhawn leh dawn. Canadian rawlthar duhawm Shapovalov hian inkhel inhnehtawk takah Robin Haase chu 7-6 (7/3), 6-7 (5/7), 6-3 in a lo hneh ve bawk, clay court hmangthiam Nadal tan awlsam taka nuai liam ngawt theih a ni bik lo ang.

World number 1 hlui Djokovic pawhin Nikoloz Basilashvili lakah 6-4, 6-2 in hnehna a chang a, John Isner 6-7 (5/7), 7-6 (7/2), 7-6 (7/5) a hnehtu Albert Ramos Vinolas nen an intawng leh ang. Serbian tlangval Djokovic tan French Open inbuatsaihna a hautak chho dawn hle.

Champion lai Zverev chuan khawtual tlangval Matteo Berrettini chu 7-5, 6-2 in a hneh ve bawk. German tlangval Zverev hian tun hnaiah Munich leh Madrid Open title a lak hnuah hnehna a chang chhunzawm zel a, clay court-ah a zawnin match 10 chhung hnehna a chang ta.

Kar hmasa maia Nadal hneh thei Thiem erawhin beisei ang result a nei lo, kum 24 mi Thiem hi Fabio Fognini lakah 6-4, 1-6, 6-3 in a tlawm. Seeded pathumna Grigor Dimitrov pawh Kei Nishikori lakah 6-7 (4/7), 7-5, 6-4 in a chak lo.