Rockets-in Golden State an nih rual

NBA regular season-a team ṭha ber chu Houston Rockets an ni a, Ningani zing khan hetiang hian champion lai Golden State Warriors lakah khel chhuakin 127-105 in hnehna an chang a. Western Confererence finals game 2 zawhah team pahnih hi 1-1 in an inhnehtawk.

Toyota Center-a inkhelah Rockets-in bul an ṭan ṭha a, hun tawp thlenga khel ṭha tluanin quarter tinah hnehna an chang a, Golden State tan thawhchhuahna remchang an siamsak lo.

Rockets tan an thiampuipa James Harden leh Eric Gordon ten point 27 ve ve an nei a, PJ Tucker chuan playoff-a a point ngah ber ṭum tawngin point 22 a nei a, Trevor Ariza (19) leh Chris Paul (16) ten double digit point an nei pha bawk.

Houston coach Mike D'Antoni chuan, "Game 2-a kan khelh dan ang hi chuan khawi hunah pawh, khawi hmunah pawh, eng team pawh kan hneh thei ang," tiin an khelh ṭhat thu a sawi.

Golden State lamah Kevin Durant-a'n point 37 zet a nei a, Steph Curry-a'n point 16 belh mah se player dang zawngin double digit point an nei pha lo. Warriors head coach Steve Kerr chuan, "Kawng engkimah kan hneh lo. Engti zawng pawhin thlir ula, engtin pawhin sawi zui ula, tun ṭumah chuan kan hneh lo. A la tawp lo," tiin an thawhchhuah ngei tur thu a sawi.

Warriors hian May 21 zing dar 5:30 hian Rockets hi Oracle Arena, Oakland-ah an mikhual thung dawn a, Game 4 pawh Warriors court-ah bawk khelh tur a nih avangin game 2-ah Rockets chak chiang mah se champion lai dinhmun hi a ṭha zawkah a ngaih theih.