Leverkusen-in DFB Pokal final lut

Bayer Leverkusen-in Thawhlehni zan khan Saarbruecken 3-0 in an hneh a, DFB Pokal final an lut. Nizan khan Bayern Munich leh Eintrancht Frankfurt ten semifinal hnuhnung zawk an khel a, result kan hre hman lo. Final hi July 4-a khelh tur a ni.

Hermann Neuberger Stadion-ah Bayer Leverkusen-in Kai Havertz leh Leon Bailey te chhawr ni lo mah se Bundesliga club tan minute 20 chhung lekin Moussa Diaby leh Lucas Alario ten an khung a, second half-ah Karim Bellarabi-a'n khung bawkin 3-0 in hnehna an chang.

Fourth tier club Saarbruecken tan keeper Daniel Batz a che ṭha lo se chuan goal tam zawk an chhuah theih ang. Batz hian semifinal an luh theih nan quarterfinal-a Duesseldorf an hneh ṭumin penalty vawi nga ngawt a dang.

Leverkusen coach Peter Bosz chuan, "Final kan thlen hi ka ring sa a, chutihrualin Saarbrucken hi kan zah hle. Goal hnih kan khung kha chuan kan chak dawn tih ka chiang. Final thlen hi thil harsa tak a ni a, chuvangin champion ngei kan tum ang," tiin sawi.