Zanin dar 9:45-ah FA Cup final

Wembley Stadium-ah zanin dar 9:45 hian Chelsea leh Manchester United ten FA Cup final an khel dawn. Antonio Conte hoten season tharah Champions League an khel dawn lo a, Jose Mourinho hote erawh Europe inelna sang berah inlan thei dawn mah se a club hlui ang thoin tun season-ah nomawi an la chawi lo.

Season liam taa Premier League champion leh Europa League champion te nomawi duhin an tuihal a, club pahnih tan ṭum dang zawng aiin FA Cup a hlu a, hei vang tak hian zanin final hi a hmuhnawm ang.

Beidawnna phena beiseina
Chelsea-in Champions League khel turin Newcastle United an hneh ngei a ṭul a, amaherawhchu Pathianni inkhelah hian Blues hi 3-0 ngawtin a chak lo. Antonio Conte te inhnem theihna chu chak pawh ni se Liverpool-in hnehna an chan tho avangin palina an ni thei chuang lo.

Amaherawhchu, London club tan nomawi beisei tur a la awm a, manto taka lakluh Alvaro Morata-a'n beisei pha lo mah se Eden Hazard chu chak puina tham a tling. Chelsea midfielder Cesc Fabregas chuan, "Player ṭha chungchuang a ni a, a khelh ṭhat niah chuan dan theih lo a ni," tiin Belgian forward a fak.

Kum 31 mi Cesc pawh hian FA Cup-ah tawnhriat a nei ṭha a, kum 2005 khan Arsene Wenger-a hoin nomawi an chawi a, season liam taah erawh a club hlui Arsenal lakah final-ah an tlawm thung.

League-a che ṭha zawk United rinkai zawk an ni em tih zawhna chungchang chhangin Cesc chuan, "Football ka khelh ṭantirh aṭangin rinkai zawk an awmin kei chuan ka hre ve lo. Nikum khan Arsenal kha kan hneh tura ngaih a ni a, kan hneh chuang lo. Tunah pawh hian United hian rinkai zawk nih an duh chuan kei chuan pawi tihna ka nei lo," tiin eng team pawh chak thei an nih thu a sawi.

Lukaku a dam?
Manchester United manager Jose Mourinho-a'n West Brom an hneh loh ṭum leh West Ham goal khata an hneh ṭuma an goal nawr nat tawk loh chhanah a ngaihdan zep ṭhen a tum lo a, Romelu Lukaku awm loh vang a nih thu a sawi.

United-in Arsenal 2-1 a an hneh ṭumin Lukaku hi a inhliam a, hemi hnu hian match hnih awl leh tawhin final-ah a inlan theih beisei a ni. Portuguese manager hian final-ah semifinal-a Tottenham Hotspur hnehtute bawk a luhtir a rinawm a, Lukaku bakah Paul Pogba leh Alexis Sanchez ten mawhphurna pawimawh chelh chungin an inlan ang.

United rawlthar Scott McTominay chuan a teammate-te fuih phurin Sir Alex Ferguson-a tana champion a ṭul thu a sawi a, damlohna khuma awm mek Sir Alex-a hian Mourinho naute chungah champion duhna a tuh thar dawn.

Mourinho vs Conte
United leh Blues manager te pahnih hi khelmual pawna ṭawngkam an thlahdah deuh avangin kumin kumtir khan an inkarah buaina a awm a, tunah erawh an chingfel tawh niin Mourinho chuan a sawi.

Portuguese manager chuan, "February thlaa kan inhmachhawn ṭum khan ka office-ah leng turin ka sawm a, engkim a ṭha vek," tiin buaina an neih loh thu a sawi.

FA Cup final hi kum 17 chhung thawk dun tawh Mourinho leh a assistant Rui Faria te thawh dun hnuhnun ber ṭum a ni dawn a, Pathiannia United captain armband hrengtu Michael Carrick tan coaching hna ṭanna a ni dawn thung.

FA Cup nomawi hian dinhmun chiang lo Chelsea manager Conte a chhan thei a, chutihrualin he nomawi hian Louis van Gaal a chhan zo lo a. Kum 2013 khan final hmain Manchester City manager Roberto Mancini chu ban a nih tur thu thuthang a awm a, Wigan Athletic hneh loin a hna a chan zui a. Zanin hi Conte tan Chelsea a enkawl hnuhnun ber a ni thei a ni.

Intluk tawk
Nikum November 5 khan Stamford Bridge-ah Chelsea-in Alvaro Morata goal hmangin 1-0 in hnehna an chang. February thlaa Old Trafford-a an inkhelh ṭumah erawh Blues-in Willian hmangin goal khung hmasa mah se United-in Romelu Lukaku leh Jesse Lingard te goal hmangin 2-1 in an lehthal.

FA Cup final-ah vawi hnih intawng tawhin Wembley Stadium sak ṭhat hma khan United hian Chelsea hi 1994 khan 4-0 in an sawp a, Wembley Stadium sak ṭhat a nih hnua FA Cup final hmasa berah Blues-in 1-0 in phuba an la thung.

United hian FA Cup nomawi vawi 12 an chawi tawh a, Arsenal record tluk turin Chelsea hneh a ngai. Blues hian Liverpool nen FA Cup nomawi hi vawi sarih an chawi tawh a, an tluk loh zingah United leh Gunners bakah Tottenham Hotspur (8) te chiah an awm.