Rii'n MHIP Football a kick-off

Mizoram Football Association (MFA) leh Mizo Hmeichhe Insuihkhawm Pawl (MHIP) in a buatsaih tur GIG Motors All Mizoram Inter Branch MHIP Football Tournament chu nimin khan Lal Riliani'n a kick-off. Inelnaah hian MHIP Branch hrang hrang 37 an tel dawn a, karleh Thawhlehni, May ni 22 aṭangin Lammual, Aizawlah khelh ṭan a ni ang.

Tournament kickoff-tu Lal Riliani chuan ramdangin football khawpui tia Mizoram min hria chu lawmawm a tih thu a sawi a. Mizo mipate'n football-ah an theihna sang tak lantir a, kan ram an tihhmingthat lai hian hmeichhiate pawn ṭan lak tharnana hman a pawimawh thu a sawi. Rii chuan MHIP kumpuan hmeichhiate leh naupangte himna tihhlawhtlin zui zel nan te pawh he tournament hi hman ṭangkai a duh thu a sawi a ni.

Tournament sponsor John Lalpeka, GIG Motors; Lalnghinglova Hmar, MFA Hony Secretary; MHIP Preident Saipuii-ten thu an sawi bawk.

Organising secretary Peter Lalzawmliana'n tournament kalphung leh hriat tur hrang hrang a sawifiah a; player chu a awmna khua/veng/block tan a khel tur a ni a, mahni awmna loa khel hriat chhuah chu khelhtir an rem tih dawn loh thu a sawi.

MHIP Football tournament-ah hian champion-in Rs. 50,000 dawngin pahnihnain Rs. 30,000 an dawng ang a, fairplay lawmman Rs. 15,000 siam a ni. Semifinalist ten Rs. 15,000 ve ve an dawng ang a, quarterfinal thleng chinten Rs, 10,000 ṭheuh an dawng ang a, tournament a tel hrim hrim ten Rs. 2,000 ṭheuh an dawng dawn bawk a ni.

May 22, Thawhlehni inkhel tur
Salem 10:00AM Chaltlang Lily Veng
Armed Veng 11:30 AM Lengpui
Bawngkawn 1:00 PM Vanbawng
Lungdai 2:30 PM Kolasib