German Cup Final ; Heynckes leh Niko Kovac tan zan hnuhnung

Zanin dar 11:30 hian Olympiastadion, Berlin-ah German Cup final khelh a ni dawn. Bundesliga champion Bayern Munich leh Eintracht Frankfurt ten nomawi an inchuh ang. Season tawp ruala chhuak tur Jupp Heynckes-a'n a hmachhawn tur hi amah thlaktu tur Niko Kovac a ni.

Team pahnih te hi 2006 DFB Pokal Cup final-ah khan an intawng tawh a, Claudio Pizarro-a goal khat hmangin Bayern Munich an chak. Frankfurt hian 2010 March thla hnuah Bayern hi inelna hrang hrangah an la hneh leh miah lo, kum riat chhung zet an record duhawm lo thaibo tumin thapui an thawh ang.

Manager pahnih
Kum 73 mi Jupp Heynckes-a'n nikum October thla aṭang khan a vawi thum nan Bayern Munich a enkawl leh a, a contract hi pawh sei a tum loh avangin season tharah chuan team enkawl hna a thawk tawh dawn lo. Carlo Ancelotti thlaktu hian zaninah hnehna a chang a nih chuan Bundesliga leh German Cup chawi chungin a chawl dawn.

German manager Heynckes chuan, "Bayern coach nih hi a ropui a, ka theihtawp

ka chhuah bawk, chutih rualin ka kum a tam deuh tawh avangin hna thawk zui tur ka ni tawh lo," a ti. Bundesliga match 1,037 zet a naute kaihruai tawhtu hi a kum ngaihtuah in chawlh a hun tawh tih a sawi a, Bayern chairman Karl-Heinz Rummenigge pawhin Heynckes an mangṭhana tur a nih thu a sawi bawk.

Manager hlawhtling Heynckes a chhuah dawn takah chuan Bayern hian a thlaktu tur an zawng a, khawvel manager ṭha leh langsar tak tak kara an thlan chu Niko Kovac a ni. Kum 46 mi Kovac hian team enkawl kawngah sulhnu a la ngah lo, Croatia a enkawl hnuah season hmasa khan dinhmun harsa taka ding Eintracht Frankfurt a enkawl.

A season khatnaah Kovac hian Eintracht Frankfurt chu Bundesliga-ah 16-na nih pui mah se German Cup final an lut a, tun season chu league-ah hmasawnin 11-na an ni a, kum zawnin German Cup final-ah an inlan dawn, a player neih dan ngaihtuah chuan a sulhnu hi a nep lo hle. Bayern manager Heynckes pawhin, "Bayern enkawl zui turin a tling tawk," tiin amah thlaktu tur hi a sawi tawh.

Hliam leh dam
World Cup a hnai a, player-te tan hliam neih a pawi zual tawh hle. Chutih rualin German Cup final khelh hi thil châkawm a ni ve tho bawk. VfB Stuttgart an hneh loh ṭuma hliam tenua nei Bayern defender Mats Hummels chuan a inpeih thu a sawi a, tlarhnungah Niklas Sule nen an dingdun ang. Jerome Boateng-a'n training zawm tawh mah se a dinhmun a la chiang lo.

David Alaba, Arjen Robben leh Thomas Muller te pawhin hliam tenau nei mah se Frankfurt lakah inlan thei tura ngaih an ni a, hliam vanga thla riat zet chawl tawh Manuel Neuer chu substitute bench-ah a ṭhut theih tawh beisei a ni–Bayern Munich captain hi chawl rei tawh viau mah se World Cup khel tur Germany squad-ah pawh telh a ni.

A zawna final khel tur Frankfurt hian hrem vangin midfielder Gelson Fernandes an chhawr thei dawn lo a, player dang erawh hliam leh hrem tawk an awm lo. Manager chhuak tur Kovac hian a hun hnuhnungah nomawi chawi a duh dawn a, season thara Europa League an khelh theihna tur kawng a nih bakah Bayern manager ni turin a tling tawk a ni tih fiah nan hman a tum ang.

Beisei a awm
Eintracht Frankfurt midfielder Kevin-Prince Boateng chuan chak tura rinkai ni lo mah se, game khat chiah khelh tur a nih avangin beisei an neih thu a sawi a, hlawhtlinna an chan theih nan fans puihna a dil bawk.

Kum 31 mi Boateng chuan, "Season tluana min ṭawiawmtu Eintracht fans chungah lawmthu kan sawi a, an puihna zarah hun duhawm kan hmang a ni. Berlin-a kan inkhelh hunah pawh nidang zawng aia nasain an puihna kan mamawh dawn, player lamin an tan nomawi petchhuah kan tum thung ang.

"Bayern tlarhnungte hi an chhuak nasa a, goal hlat takah an inveng ṭhin. Keini chuan an chak loh rukna lai kan hria a, chumi laiah chuan kan bei dawn a ni," tiin a sawi.

Frankfurt lamin beisei an neih laiin Bayern lamin inthlahdul an tum bik lo. Heynckes chuan, "Berlin-ah chuan Bayern hmel dang in hmu ang," tiin a sawi. Defender Mats Hummels pawhin manager chhuak tur Heynckes thlah nan nomawi chawi ngei an tum thu a sawi ve bawk.