En châkawm NBA Playoff finals

LeBron James-a telna Cleveland Cavaliers chuan Eastern Conference finals game hmasa pahnihah Boston Celtics an hneh lo a, Pathianni zing dar 6:00 hian Quicken Loans Arena-ah game 3 an khel dawn. Cavs hian NBA finals beiseina chhi nung turin an 'home' ah hnehna an chan ngei a ṭul dawn.

Western Conference finals-ah Houston Rockets-in champion lai Golden State Warriors chu game 2-ah an hneh let a, game 3 hi GSW court Oracle Arena-ah khelh tur niin Thawhṭanni zing dar 5:30-a khelh tur a ni.

Cavs beiseina
Celtics-in TD Garden-a vawi hnih khelh tawhah hnehna chang ve ve mah se Cavs tan infuihphurna tur ṭha tak a awm. Boston hi playoff china an court-a vawi kua an khelah an chak vek a, an mikhualna hmunah erawh vawi nga khelhah vawi nga chiah an chak.

Boston guard Jaylen Brown erawhin, "Hemi chungchangah hian sawi tur ka nei lo, game 3 hi ka nghakhlel takzet a ni," tiin Cavs court-a fiahna hautak paltlang a duh thu a sawi.

Game 2-ah LeBron James chuan triple double neiin 42 points, 10 rebounds leh 12 assists an nei a, a nghawngah hliam a tuar thung. Cavs coach Tyronn Lue chuan Ningania an training-naah erawh James hian a theihna zawng zawng a chhuah leh thu a sawi a, game 3-ah ṭha taka a inlan theih beisei a ni.

Lue chuan a point guard pahnih J.R. Smith leh George Hill te chu basket tam zawk nei turin a beisei a, anni pahnih hian game 2-ah Celtics guard pahnih Jaylen Brown leh Terry Rozier te chu point ngah kawngah 72-12 in an hneh lo. Cavs coach Lue pawhin James-a'n puitu a mamawh thu a sawi.

Oakland zin tur Rockets
Houston Rockets-in game 2-ah 127-105 in hnehna an chang a, Oakland-ah fiahin an awm dawn.

Rockets innghahna James Harden chuan, "Kan tih turah kan chiang a, kan khingpui lam kan ngaihtuah lo. Kan khingpui te hi hnehtu an awm hma loh chuan champion lai an ni a, rinkai lo zawk kan ni tih pawh kan hria, chuvangin hnehna chang turin huaisen zawk leh theihtawp chhuaha kan beih a ṭul a ni," tiin a sawi.

GSW hi NBA champion lai ni mah se Rockets hi regular season-a pakhatna an ni thung a, series-ah 1-1 a nih chiah bawk avangin team pahnih inkhel hi a hmuhnawm ang.