City manager-in contract a pawtsei

Manchester City manager Pep Guardiola chuan contract thar ziakin kum 2021 thleng Etihad Stadium-ah a cham dawn. Spanish manager hian City chu record ṭhahnem tak siam chungin Premier League-ah a champion pui a, season khata point 100 hmu thei hmasa ber an ni.

Guardiola chuan, "Ka lawm a, ka phur tel bawk. City tana hna ka thawk thei hi ka lawm a, player-te thawhpui an nuam a, kan hmalam hunah theihtawp kan chhuah ho zel ang," tiin a sawi. City hi Pep-a'n season thum aia rei contract a ziahna hmasa ber a ni a, hemi hmaa a enkawl Barcelona chu season li a enkawl a, Bayern Munich chu season thum a enkawl bawk.

Spanish manager hian City hi match 113 a enkawlah vawi 77 hnehna a chanpui a, an chak percentage hi 68% a ni. Tun season league bikah match 32 hnehna a chanpui a, hei hi ama puala record thar niin 2009-10 season-a Barcelona vawi 31 a chak pui record chu a khum chiah.

Pep hian manager hna season kua a chelh tawhah nomawi liantham 23 a chawi tawh a, chung zingah chuan La Liga leh Bundesliga nomawi pathum bakah Premier League nomawi a tel a, Catalan club hi Champions League-ah vawi hnih a champion pui hman bawk.

City ṭha zawk!
Manchester City-in Roberto Mancini hnuaiah 2011–12 season khan Premier League nomawi hmasa ber an chawi a, Manuel Pellegrini hoin 2013–14 season-ah a vawi hnih nan an chawi nawn.

Chilean manager Pellegrini hian 2015-16 season enkawlin nomawi pali an chawi vek theih laiin manager atan Pep Guardiola an lakluh tur thu an puang. City neitu lamin nomawi bakah league thunun an duh tih a lang a, Pep-a chungah beiseina sang tak an nei tih chiang bawk.

Pep-a'n City a enkawl kum khatnaah Premier League-ah pathumna a nihpui a, FA Cup-ah semifinal-ah an tawp a, Champions League leh EFL Cup ah last 16 bak an thleng lo. Club chairman Khaldoon al-Mubarak chuan Spanish manager season khatna hi nomawi aṭanga tehin beisei pha lo ti mah se hmasawnna a awm thu a pha lo.

Ningani khan Al-Mubarak chuan, "Season hnih chhung hian club chhungah inrintawkna nasa tak a rawn tuh a, khelmual chhung leh pawnah hmasawnna nasa tak a awm. Kan thil tum hi ani ho hian tih puitlin chhoh kan tum ang," tiin hmasawn zel an tum thu a sawi.

City hi tun season-ah Premier League leh League Cup-ah an champion a, an duh ber Champions League-ah erawh Liverpool hneh loin quarterfinal an tla. League-ah record ṭhahnem tak siam mah se Pep-a'n club ropui dang Manchester United leh Liverpool te elpha turin nomawi tam zawk chawi a ṭul thu a sawi a, Europe lamah an la chawi ngai loh Champions League nomawi chu chilthli tla chunga thlir ringawt loa chawi ve ngei an tum bawk ang.