Djokovic-a'n quarterfinal a lut

Novak Djokovic chuan kumin chhunga a vawi khat nan quarterfinal a lut ve ta. World number 1 hlui hian Albert Ramos-Vinolas chu 6-1, 7-5 a hnehin Italian Open khelh laiah a thiam pariat zingah a inhlangkai a ni.

Ningani zan inkhelah Djokovic hian a tir aṭangin inkhel a thunun a, thla ruk zet hliam vanga a chawlh hnua a ṭhat berte zinga mi a ni a - semifinal lut tur chuan Kei Nishikori a paltlang leh a ngai ang. Japanese tlangval hi kar hmasa khan Madrid Open-ah a lo hneh tawh.

Kum 30 mi Djokovic chuan, "Tun hnai kum khat chhungin tun ṭuma ka match ang hi ka khel chhuak khat hle. Khelh ṭhat ka mamawh hunah tak ka che fuh a, hei hian inrintawkna tam tak min siamsak ngei ang," tiin a sawi.

Inkhel dangah cham­pion tura rinkai Rafael Nadal chuan Canadian rawlthar beiseiawm Denis Shapovalov chu 6-4, 6-1 in a sawp. Shapovalov hi tun hnaiah khel ṭha viau mah se clay court hmang thiam Nadal lakah chuan a ruh a la no deuh hret a ni. Grand Slam vawi 16 champion tawh Nadal hian Fabio Fognini a hmachhawn leh ang.

US Open champion tawh Marin Cilic chuan Benoit Paire chu 6-3, 6-4 in a hneh. Munich leh Madrid Open champion ni thei Alexander Zverev pawhin inkhel inhnehtawk takah Kyle Edmund chu 7-5, 7-6 (13-11) in a hneh ve bawk. Juan Martin del Potro erawh David Goffin lakah 6-2, 4-5 in a hniam zawk laiin a khel bawr na vangin a inlan chhunzawm thei lo.