Buffon-a'n nomawi chawi dawn

Juventus chuan zanin dar 6:30 hian Verona an mikhual dawn a, tun season Serie A a an match hnuhnung ber an kelh zawh hian league title an la nghal ang. Season tawp ruala Turin club chhuahsan tur Italy goalkeeper Gianluigi Buffon chuan a hun hnuhnung berah Juve tan nomawi a chawi dawn.

Massimiliano Allegri nau­ten match khat khelh hma­bak nei chungin a zawna a vawi sarih nan an champion tih an nemnghet a, zaninah hian an goalkeeper chhuak tur thlah nan nuamsa takin khelmual an lut thei dawn - inkhel boruak sang a beisei awm loh a, chutih rualin Buffon vang chauh pawhin Juventus Stadium chhungah thawm a ring ang.

Kum 40 mi Buffon hian season ruk zet chu a zawnin Serie A nomawi hi a chawi tawh a, kuminah pawh Coppa Italia leh league nen hun a khar dawn. Season tharah chuan Arsenal keeper hlui Wojciech Szczesny-a'n a hmunruak a luah tawh dawn, Poland international hi rinrawl a ni ngei dawn tih erawh an la ti chiang rih lo.

Buffon a chhuah dawn takah chuan defender rinrawl Giorgio Chiellini chu Juventus captain thar a ni dawn a, Italy international Chiellini leh Buffon te hi Juventus tan season 13 zet an khel dun tawh a ni.

Bianconeri captain chhuak tur Buffon chuan, "Giorgio hi thurawn ka pek a ngai tawh hran lo a, hun rei tak chhung kan awmdun tawh. Ka hmaah a ding ṭhin a, a theihna san zia ka hre chiang, captain ṭha leh rintlak a ni ngei ang tih chu ka hria, duhsakna sang ber ka hlan bawk," tiin a sawi.

Team 20 awmna Serie A hi Pathianni zanah tun season kharna hun neih a ni zui dawn a, champion Juventus bakah Napoli, AS Roma leh Lazio te chu season thara Champions League khel turin an tling tawh. Europa League-a inlan turin Inter an chiang tawh a, AC Milan tan Europa-a inlan turin Fiorentina lakah chak a ngai bawk.