Hamilton nen hna kan la zo lo - Wolff

Mercedes team principal Toto Wolff chuan an driver duhlai Lewis Hamilton chu chelh theih ngei a inbeisei a, an hmabakah hnathawh zawh loh leh hlen chhuah tur an la neih thu a sawi chhuak.

Champion lai Hamilton hian Mercedes tan tun season daih bak contract a nei tawh lo, a pawtsei lo a nih chuan nakkumah chuan a duh lam a hawi thei dawn - kum 35 mi ni tawh mah se team dangte awh rawn a la ni.

F1 season kal laiah pawh Britain tlangval hian hma a hruai mek, a chesual viau a nih ngawt loh chuan a vawi sarih nan a champion dawn. Record nei ṭha ber Michael Schumacher a nihrual chiah thei ang.

Wolff chuan, "Kei chuan Mercedes chhuahsana hna dang thawh tumna ka nei lo, chutiang bawk chuan Lewis pawhin ngaihtuahna a hman ka ring. Hmachhawp leh tih duh tam tak kan la nei a, chumi hlen chhuak tur chuan kan thawhho zel ka beisei.

"Season tharah pawh team ṭha leh ngelnghet tak din leh kan tum, kuminah team ṭha ber kan nih ang bawk hi kan nih leh pawh ka ring," a ti. Mercedes hi midang elphak lohin team champion an ni chiang tawh.