Man United inkhel tur an ṭhulh

Manchester United chuan Premier League khelh chhunzawm tura inbuatsaih nan Stoke City chu friendly match khelhpui an tum a, mahse Thawhlehni zan khan an inkhelh tur hi chawpchilh taka ṭhulh a ni.

Championship club Stoke player-te chu United training ground lamah an thleng hman, mahse an manager Michael O'Neill chu Covid-19 a kai tih hriatchhuah a nih avangin an inkhel thei ta lo.

Nothern Ireland manager hi tun hmain coronavirus a kai leh kai loh hi vawi nga endik a ni tawh a, a fihlim vek; a vawi ruknaah erawh hripui hi a kai tih hmuhchhuah a ni thung.

Stoke chuan thuchhuah siamin, "June 8 khan Covid-19 endikna neih leh a ni, manager O'Neill chuan hri hi a kai. Tunah chuan enkawlna lam kalpui nghal a ni ang, ṭha chhuak leh thuai turin duhsakna kan hlan," an ti.

English Premier League hi June 17 aṭanga khelh chhunzawm leh tum a ni a, tun thlengin United hian friendly match an la nei rih lo. Table-a pangana team hian an match hmasa ber atan June 19 hian Tottenham Hotspur an hmachhawn ang.