SAFF Championship: Champion tumin India khel dawn
Match hmasa pahniha Bangladesh leh Sri Lanka an inhnehtawkpui avanga sawisel hlawh tak India chu SAFF Championship final khelh hun a thlen meuh chuan a thiam pahnih zingah an tel.
Zanin dar 8:30 hian South Asia-a football thiam ber ram zawngin India leh Nepal an inkhel dawn a, team pahnihin champion aia hniam an ngaihtuah lo ang.
Mizo tlangval Lalengmawia chuan, "Nepal hi hneh tawh mah ila, final a nih chuan boruak a danglam ve deuh ṭhin. Mahse, hnehna kan chan ngei erawh ka beisei e," tiin Vanglaini a hrilh a, kut ruaka lo haw a tum lo.
Mizoram Football Association honorary secretary Lalnghinglova Hmar chuan final hi a hmunah a en dawn a, Maldives-ah hian SAFF hruaitute inhmuhkhawmah India aiawhin a kal a ni.
A 'hot' dawn
Nepal tan chuan India an 'u' hret a, an ram football player-te pawhin Indian Super League khelh phak hi an châk chu a ni. Mahse, football-ah chuan eng pawh a thleng thei a, Nepal hi chak lo saa dah a rem lo.
SAFF Championship khelh a nih hma khan ram pahnih hian friendly match an khel a, vawi khat inhnehtawkin vawi khat India an chak a, SAFF-a an intawn ṭumin 1-0 in India an chak zui.
Group Stage-a hnehna an chan ṭumin India coach Igor Stimac-a'n an goal khung leh chak chu uchuak takin a lawm a, Nepal coach Abdullah Al Mutairi chuan Croatian coach chet dan hi a dem zui.
Mahse, Stimac a ngawi lo. A vanglaia Croatia tana vawi 53 inlan thei hian, "Ka chet dan leh chak ka lawm dan a lo ngaihtuah a ṭul lo," tiin Nepal coach a kap let zui a, zaninah boruak a 'hot' loh ring suh!
Nepal an ṭha
SAFF-a match li an khelhah Nepal-in vawi khat chiah chak loh an nei a, point sarih hmu chungin final hi an lut - SAFF Championship-ah he team hian final an la lut ngai lo a, champion ngun ber India (7 title) lakah rin hlawh lo zawk an ni.
Mahse, group stage-a India leh Nepal inkhel en chuan vanneihnain India a pui tel tih an hria ang a, chak chiang saah Blue Tigers an dah ngam lo ang - a harsa dawn.
Kum 29 mi midfielder Rohit Chand hi player ṭha bik a ni a, thlah fal loh a ṭha. India-a HAL SC tan pawha lo khel tawh player hian Indonesia top flight (Liga 1) club Persija Jakarta tan a khel mek a, kum 2018 khan Liga 1 Best Player-ah hial thlan a lo ni tawh.
Blue Tigers nen an inkhelh hmasaka goal hmaa vannei tawk lo Anjan Bista chu India tan ngaihthah loh tur pakhat a ni a, kum 23 mi forward hian chetsual vawi khata khingpui team hrem turin theihna a nei sang tawk.
India & buaina
Blue Tigers-in Maldives an hneh ṭumin thil duhawm lo an hawn tel a, coach Stimac chu match official-te laka a kam tam luat avangin technical area aṭanga hnawhchhuah a ni a, zaninah a naute a ho theih a rinawm loh.
India tan centre back Subhasish Bose chu hrem a nih avangin a inlan thei dawn lo bawk a, mahse, tlarhnung laia Rahul Bheke kawppui turin Manipur tlangval Chinglensana Singh a awm sa avangin a manganthlak loh tura ngaih a ni.
Apuia'n tun inelnaah vawi hnih chiah bul a ṭan a, India an chak ve ve - ISL player man to ber hi final-ah pawh bul ṭan leh ngei tura beisei a ni a, Vaivakawn tlangval khelh dan hian India result tur thui takin a hril ang.
Stimac-a'n Nepal laka hnehna an chan hnu khan Maldives lakah a starting XI thlak danglam miah loin India a chakpui zui a, zaninah pawh Subhasish thlak ngei ngei a ngai tih loh chu player a thlak danglam lo tura ngaih a ni.
A hming Chhetri
Tlarhmaah Sunil Chhetri bawk chu thlir rawn ni leh tur a ni a, India captain hi inkhel boruak sangah a talbuai ve ngai loh avangin innghahna tlak a ni tih chu inhrilh nawn kan ngai lo.
Chhetri-a'n ram tana goal 79 zet a khungna kawngah Maldives lakah a khung hnem ber a, match ruka Maldives-a hmachhawnah goal riat a khung - a nep lo hle.
Maldives dawta Chhetri-a'n a zuam ber chu Nepal an ni a, Nepal a hmachhawn vawi 11-ah goal sarih a khung - Nepal tlarhnung tan fimkhur a ṭul tihna a ni a, Chhetri ven bik a sual lo ang.
Nepal tan tun hi SAFF Championship final an luh vawi khatna a ni a, kum 1993-a a vawi khat nana SAFF Championship khelh a nih khan pathumna an ni - hei lo chhuan tur an nei lo.