November 5 aṭangin Futsal Championship

All India Football Fede-ration hnuaia India ram pum huap futsal inelna lian tham hmasa ber Hero Futsal Club Championship chu November 5-13, 2021 chhung hian Delhi-ah khelh a ni dawn.

AIFF president Praful Patel chuan, "Hero Futsal Club Championship inelna hi ram pumin infiamnaa hma a sawn theih nana AIFF hmalakna pakhat a ni a, inelna hmachhawn tur team 16 te duhsakna kan hlan e," tiin a sawi.

Futsal inelna hmasa berah hian Mizoram aiawhin Chanmari Zothan Futsal Club an tel dawn a; team dang 15 te chu Baroda FC (Gujarat), Kuppuraj FC (Puducherry), Super Strikers FC (Karnataka), Speed Force FC (Telangana), Sporting Clube de Goa (Goa), Delhi FC (Delhi), Real Kashmir FC (Kashmir), Telongjem FC (Nagaland), Classic Football Academy (Manipur), Mangal Club (Odisha), Niaw Wasa United Sports & Cultural Club (Meghalaya), Bengaluru FC (Karnataka), TRAU FC (Manipur), Mohammedan SC (West Bengal) leh Sudeva Delhi FC (Delhi) te an ni.

Inelna hi ruahmanna hmasaah chuan Shillong-a neih tur a ni a, endik a nih hnuah a ṭhat tawk loh avangin an sawn. Delhi-a inelna neihna tur hi KD Jadhav Indoor Hall, Indira Gandhi Arena a ni a, tun hnaiah hlawhtling takin inelna ṭum hnih an thleng.

Mizoram aiawha tel tur Chanmari Zothan hian ngawrh takin inbuatsaihna an kalpui a, Sunflowers Electronic (Chanmari), LB Associates (Bungkawn) leh Zauthanga Enterprise (Edenthar) aṭangin sponsor an hmu tawh a, Mizoram State Spors Council aṭangin training kit tlem a zawng an dawng tawh bawk.

Chanmari Zothan hian tualchhung futsal inelnaah record ṭha tak an nei a, MFA hnuaia Futsal League season hnih awm tawhah an champion ve ve a ni.