Ansu Fati a chawl rei dawn

Barcelona forward Ansu Fati chu a khup hliam zai a ni a, thla li chhung vel chu a inkhel thei dawn lo. Rawlthar duhawm hliam hi Catalan club tan chuan channa lian tak a tling ang.

Kum 18 mi Fati hi Barcelona leh Real Betis inkhelh ṭumin a hliam a, Thawhṭanni khan Barcelona-ah Dr. Ramon Cugat chuan a hliam hi endikin zai  a ni a, a chawlh chen tur hi club chuan an puang nghal.

Barca mai bakah Spain tan pawh Fati inhliam hi channa a ni. Switzerland, Netherlands leh Germany hmachhawn tur Spain squad-ah telh a ni a, a inlan theih dawn loh avang hian a hmun ruakah Real Madrid player Marco Asensio chu an ko.

Ronald Koeman kaihhruaina hnuaiah Fati hian season bul a ṭan fuh hle, inelna hrang hrangah match 10 a khelh aṭangin goal nga a khung a, a ṭhiante khung tur vawi hnih a siamsak tawh bawk.