Zonet-ah Sangtea inhnek

WBC youth champion Lalrinsanga Tlau chuan October 23, Inrinni hian Conrad Hotel, Dubai-ah Georgian boxer Ilia Beruashvili a hmachhawn dawn. Khawruhlian tlangval Sangtea te inhnek hi Zonet kaltlangin a en theih ang.

Kum 21 mi Sangtea hian professional fight vawi nga a hmachhawn tawhah a la chak vek a, kumin March 6 khan Ghanaian boxer Eric Quarm hnehin WBC Youth World Super featherweight title a la. Tun ṭum hi WBC Youth title a lak hnua a inhnek hmasa ber tur a ni.

Centre of Excellence (SYS) head coach R. Lalchhuanawma (Setea) chuan, "Sangtea hi ka thlirna aṭang chuan Mizo boxer zingah a defence a ṭha ber. A defence tawh hnuah a khingpui kut tum buma hnek let hi a thiam em em a, defence leh counter-a a ṭhatna hi a special-na a ni. Boxing legend Floyd Mayweather nen an khelh dan hmang pawh a inang hle," tiin Khawruhlian tlangval a fak.

Sangtea hian SAI aṭanga a inzir hnuin Setea hnuaiah hian a inzir leh a, Mizo boxing coach lar hnuaiah hian WBC Youth title pawh a la. Mizo boxer Sangtea hi Grassroot Boxing Promotions and Management hnuaiah contract a nei mek.

Dubai-a Mizo tlangval inhnek hi Zonet kaltlangin a en theih dawn a, Sangtea leh Georgian boxer Ilia Beruashvili inhnek en duh chuan mahni Zonet distributor te ṭheuh biak tur a ni. Tunah hian internet kaltlanga en theih dan tur pawh buaipui mek a ni bawk.