Zohmingliana Ralte a chawl ta

Mizo footballer thleng thui ber zinga mi Zohmingliana Ralte chuan Ningani khan football khelh a chawlhsan thu a puang. Zotea hian National Under 16-ah Mizoram a champion pui a, Mizoram senior team thlenga a khelh hnuin India club ṭhaah khel kualin I League-a Aizawl FC champion ṭum khan defender pawimawh a ni.

Ramhlun South-a cheng Zotea chuan, "Ka pain min kalsan tawh a, ka naupang chhe tawh lo bawk nen chhungkaw uap turin football khelh chawlhsan turin thutlukna kan siam ta a ni," tiin Vanglaini a hrilh.

Mizoramin state danga National Under 16 nomawi an chawi hmasak ber ṭum, kum 2004 khan Zotea hi player pawimawh a ni a. Inelna hi Goa-ah neih niin semifinal-a Tamil Nadu an hmachhawn ṭumin goal awmchhun a khung.

Zotea hian Mohun Bagan academy leh Arhima (Rangdajied United) ah te a awm hnuin kum 2008 khan Shillong Lajong a zawm a, Lajong aṭang hian hriat a hlawh lehzual. Lajong tana kum li a khelh hnuin I League club ṭha Pune FC tan a khel a, AFC Cup-ah Hong Kong club Kitchee SC lakah goal a khung.

Mizo defender hian ISL club NorthEast United FC leh I League club DSK Shivajians tana a khelh hnuin kum 2017 khan Aizawl FC tan a rawn khel. Mizo club-in I League nomawi an chawi thei nan Zotea hian Mohun Bagan nen an inkhelh ṭumin minute 83-naah goal pawimawh a khung.

Aizawl FC hian an elpui Mariners an hneh avangin champion tur match hnuhnung berah Shillong Lajong lakah point khat hlawhchhuah a tawk. Captain Alfred Kemah Jaryan hrem a nih avangin Zotea hian captain armband a hreng a, Mizo tlangval hian Mizo club hi chen ngai lohna ram a thlenpui.

Zotea chuan, "AFC Cup-ah te goal ka khung ve tawh a, Aizawl FC tana Mohun Bagan lama ka goal khung kha chu ka ngai hlu takzet. Ka football career chhunga ka hun tawn ropui berah ka ngai.

"Football khelh kan chawlhsan takah chuan ngaihtuahna a kal thui hle. Mizoram tan theihtawp kan chhuah ṭhin a, chutiang bawkin a tawpa min chawimawitu chu Mizote bawk an ni. Ka inkhelh chhunga zawnga Mizo mipui min thlawpna zawng zawngah lawmthu ka sawi," tiin Vanglaini a hrilh.

Aizawl FC tan season khat chauh a khel hnuin Zotea hi Bengaluru FC leh Chennaiyin FC tan a khel leh bawk. Zotea hian an veng Ramhlun South hi CYMA Football leh NECS Cup-ah ṭum hnih a champion pui a, CYMA Football 2017-ah khan best player-a thlan a ni.