Sterling-a'n chhuah a hreh lo

Manchester City for-ward Raheem Sterling-a'n khelhna hmun a chang tam lo a nih chuan England chhuahsan a hreh loh thu a sawi. Kum 26 mi Sterling hi Etihad Stadium-ah kum 2023 thleng contract a nei a ni.

England international Sterling chuan, "Ka naupan lai aṭangin ram pawna inkhelh hi ka châk a, hun ṭha a inhawng a nih chuan uluk takin ka ngaihtuah ang. Tun dinhmunah chuan ka tan football a pawimawh ber a, chona thar hmachhawn te pawh a châkawm," tiin a sawi.

Sterling hian kum 2015 khan Liverpool aṭangin pound maktaduai 49-in Man City hi a zawm a; Premier League nomawi pathum bakah League Cup (4) leh FA Cup (1) ah te a champion tawh.

Nipui bazarah Man City-in pound maktaduai 100-in Jack Grealish an lalut a, Sterling-a'n khelhna hmun chan tlem phahin league match vawi hnihah chiah bul a ṭan a, bench aṭangin vawi nga a lut tawh bawk.

Sterling hian khelhna hmun a chan tam loh chuan contract thar ziak loin Manchester City chhuahsan a hreh lo tih a chiang. Amaherawhchu tlarhma lamah inhliam vangin Ferran Torres a chawl rei dawn a, Sterling-a'n khelhna hun a ngah thei ang.

Manchester City hian zanin dar 7:30 hian Etihad Stadium-ah Burnley an mikhual dawn a, Pep Guardiola hoten hnehna chan ngei an tum dawn. Premeir League champion hian match sarihah point 14 an hmu a, pathumnaah awmin an chungah Chelsea (16) leh Liverpool (15) te an awm a ni.