Foxes hmaah Ole leh Man United fiahna
Zanin dar 7:30 hian Manchester United chu King Power Stadium-ah Leicester City nen an inkhel dawn a, tun hnaia beisei pha lo Ole Gunnar Solskjaer leh a hote fiahin an awm dawn.
Man United hian league match hnuhnung pahnihah Aston Villa an hneh loh bakah Everton nen an inhnehtawk a, Foxes an hmachhawn zawhah Atalanta, Liverpool, Tottenham, Atalanta leh Manchester City te nen an inkhel dawn. Solskjaer hote hi an fixtures a hautak avangin December thla tirah meuh chuan table laihawl vela awm thei dinhmunah an ding.
Buaina chu
Cristiano Ronaldo-a'n Manchester United tana a khelh leh hnuah league match li aṭangin goal thum a khung a, hmun pawimawh a chang nghal. Amaherawhchu Ronaldo meuh telna Man United hian eng team pawh hmachhawn se an tum tawk zel a, an chak ṭumah pawh harsa takin hnehna an chang.
Ole hnuaiah Man United inkhel a nun tawk loh avangin Norwegian manager chhuak tura duhtu pawh an tam phah hle. Harsatna awm sa belhchhah turin Foxes an hmachhawn hunah Man United an kim dawn lo.
Nipui bazara lakluh Raphael Varane chu hliam vangin a inlan thei dawn lo a, captain Harry Maguire pawh a dam hman a rinawm loh. Defender pawimawh pahnih bakah hian World Cup qualifier khel tura zin Uruguayan striker Edinson Cavani leh Brazilian midfielder Fred te a inlan hman a beiseiawm lo bawk.
Chutihrualin Man United khingpui tur Leicester City pawhin season bul an ṭan fuh lo a, match sarihah point riat chiah an hmuh avangin 13-naah an awm mek. Brendan Rodgers-a hote hi hliam vangin an buai ve tho - full back James Justin (khup) leh central defender Wesley Fofana (ke) leh midfielder Wilfred Ndidi (malpui) te chu hliam vangin an khel thei dawn lo.
Beiseina thar
Man United-in lawmna tur an zawng a nih chuan international break hmangin a chhanna a awm. Jadon Sancho, Bruno Fernandes leh Cristiano Ronaldo te mahni ram ṭheuh tan an khel ṭha a, Man United tan an chet ṭhat hi an chhunzawm thei a nih chuan chanchin lawmawm a ni ang.
Mason Greenwood, Anthony Martial leh Jesse Lingard te pawh an dam ṭha a, veteran striker Cavani awm lo pawh ni se a thlakna tur a awm thei dawn. Marcus Rashford pawh a dar zai hnuah training pangngaiah a tel leh tawh a, bul a ṭan loh pawhin bench aṭangin a lut thei ngei tawh ang.
Man United buaina erawh tlarhnung a ni a, Maguire leh Varane te an awm lo a nih chuan Victor Lindelof leh Eric Bailly te an luh a ṭul ang. A êng zawnga thlir chuan Lindelof leh Bailly te hi Sweden leh Ivory Coast rinrawl ve ve an ni a, an theihna thlir chuan innghahna tlak an ni.
Hriat tel tur erawh Leicester City striker Jamie Vardy-a'n tun season league-ah goal ruk a khung der tawh a, Man United tlarhnung tan ven uluk a ṭul dawn. Ole hote hian Foxes hi an hmachhawn hnuhnung pathumah hneh an nei lo a, Brendan Rogers-a hote hian Man United an hma-chhawn hnuhnung pahnihah hnehna an chang.