Timo Werner a inringtawk

Chelsea striker Timo Werner chuan a inrintawk thu a sawi a, khelmuala a chet dan duhkhawp loh vanga amah sawiseltute ṭawngkam a dawn pawh chakna petu a nih zawk thu a sawi.

Germany interna-tional hian nikum nipui lai khan RB Leipzig aṭangin Chelsea a zawm. Bundesliga lama a chet dan chhutin Blues tan pawh goal thun khawl ni thei tura ngaih a ni nghal.

Mahse, season hmasa khan league match 35 a khelh aṭangin goal ruk chauh a khung, heng inkhelah hian ṭum 29 ngawt bul ṭantu zingah a tel. Kuminah pawh beisei angin goal a la khung pup pup lem lo.

Werner chuan, "Sawiselna leh fakna chi hrang hrang hi chu keimah chauh ni loin midangte pawhin an dawng vek. Hetiang thu leng vel vanga kan buai a nih chuan inkhelh pawh kan ngaihtuah ve hman lo ang.

"A pawimawh ber chu tunge kan nih hriat hi a ni, ka theihna leh tih theih chin ka hrechiang a, chuvangin goal ka khung tam loh lai pawhin inrintawkna ka nei reng," tiin a sawi a, goal tam zawk khung erawh a duh.

Chelsea hian striker Romelu Lukaku an lei a, tlarhma laiah Belgium international hi hmun pawimawh changtu a ni. Player thawkrim Werner hi coach Thomas Tuchel-a'n a la thlauh thla chuang lo, mual sirah ṭangkai takin a la chhawr reng.

Werner hian Blues tana a match hnuhnung berah goal a khung a, ram tana a feh chhuahna lamah goal a khung zui leh bawk. A goal khung kaltluang lai hi tun kar tawpah pawh chhawm nun leh ngei a tum dawn.

Tuchel-a naute hian zanin dar 10:00 hian Premier League khel turin Brentford an lenchilh dawn. Chelsea hi chak tura rinkai zawk an ni a, mahse Brentford Community Stadium hi Arsenal pawh an chetsual tawhna hmun a nih avangin fimkhur a ngai ang.